Ýkraınanyń Qazaqstandaǵy burynǵy elshisi Petr Vrýblevskııge Máskeýdiń Basman soty syrttaı úkim shyǵaryp, ony alty jylǵa bas bostandyǵynan aıyrdy, dep habarlaıdy Dalanews.kz.
Bul týraly advokaty Dmıtrıı Kırsanov RIA Novostı agenttigine habarlaǵan.
Reseı taraby Vrýblevskııdi ulty men tiline baılanysty jekkórýshilik pen arazdyq qozdyrýǵa shaqyrdy dep aıyptady. Aıyp QR Qylmystyq kodeksiniń 282-baby 2-bóligi "a" tarmaǵy boıynsha (zorlyq qoldaný qaýpimen kópshilik aldynda jasalǵan arandatýshylyq) taǵylǵan.
Tergeý derekterine súıensek, 2022 jyldyń tamyzynda ol Qazaqstandaǵy elshi qyzmetin atqaryp júrgen kezinde bergen suhbatynda Reseı azamattaryna qarsy kúsh qoldanýǵa úndeıtin málimdeme jasaǵan. Bul suhbat ınternette ashyq taralǵan. Keıin Vrýblevskıı tergeýden jasyrynǵan jáne halyqaralyq izdeýge jarıalanǵan. Sot oǵan syrttaı qamaý túrindegi bultartpaý sharasyn qoldanǵan.
2022 jyly áleýmettik jelilerde Vrýblevskııdiń «orystardy óltirý kerek» degen mazmundaǵy vıdeosy tarap, bul qoǵamda úlken rezonans týdyrǵan. Osydan keıin Qazaqstan bıligi oǵan "qajetsiz tulǵa" degen mártebe bergen, al Ýkraına ony elden keri shaqyryp alǵan. Keıin onyń ornyna jańa elshi taǵaıyndalǵan.
2024 jyldyń aqpanynda Reseıdiń qarjylyq monıtorıń agenttigi (Rosfınmonıtorıng) Petr Vrýblevskııdi ekstremıster men terrorıster tizimine qosqan. Onyń aty-jóni Reseı İİM-niń izdeý bazasyna da engizildi.
Bul Vrýblevskııge shyǵarylǵan alǵashqy úkim emes. Buǵan deıin de ol syrttaı alty jylǵa sottalǵan edi. Alaıda Máskeý qalalyq soty úkim shyǵarýda prosesýaldyq zańbuzýshylyqtar boldy dep eseptep, isti qaıta qaraýǵa jibergen bolatyn. Endi jańa úkim qaıtadan sol merzimdi – 6 jyl bas bostandyǵynan aıyrýdy qarastyrady.
