كۇن تارتىبىندە اۋعانستانداعى جاعدايعا قاتىستى وڭىرلىك قاۋىپسىزدىك، سونداي-اق قازاقستان مەن رەسەي اراسىنداعى ىنتىماقتاستىق جانە ينتەگراسيالىق بايلانىستار اياسىنداعى ءوزارا ءىس-قيمىل ماسەلەلەرى قارالدى.
مەملەكەت باسشىسى رەسەي پرەزيدەنتىنە ماسكەۋگە شاقىرعانى ءۇشىن العىس ءبىلدىردى.
– شىن مانىندە، ءبىزدىڭ بايلانىستارىمىز ەشقاشان توقتاعان جوق. پاندەميا كەزىندە دە ونلاين جۇيەسىندە جانە تەلەفون ارقىلى بايلانىسىپ تۇردىق. دەگەنمەن، ءجۇز رەت ەستىگەننەن ءبىر رەت كورگەن جاقسى، – دەدى قاسىم-جومارت توقايەۆ.
قازاقستان پرەزيدەنتى ەكى ەل اراسىنداعى بارلىق باعىتتاعى ءوزارا ىنتىماقتاستىققا جوعارى باعا بەردى.
– قازاقستان مەن رەسەي – وداقتاس ەلدەر. ءبىز ۇنەمى حالىقارالىق كۇن تارتىبىندەگى وزەكتى ماسەلەلەردى، قاۋىپسىزدىكتى، اسىرەسە ەكىجاقتى ىنتىماقتاستىقتى ۇنەمى پىسىقتاپ وتىرامىز. ەلدەرىمىز اراسىنداعى قاتىناستارىمىز ستراتەگيالىق ارىپتەستىك باعىتىندا دامىپ وتىرعانى قۋانتادى، – دەدى مەملەكەت باسشىسى.
ۆلاديمير پۋتين ەكى ەل اراسىنداعى تىعىز بايلانىستاردى اتاپ ءوتتى.
– ءبىزدىڭ بايلانىستارىمىز ۇزىلگەن جوق. قاتىناستارىمىزدى تۇراقتى، وتە جوعارى دەڭگەيدە جانە بارلىق باعىتتار بويىنشا جۇرگىزىپ كەلەمىز. بۇل – پارلامەنتارالىق جانە ۇكىمەتارالىق بايلانىستار. جاقىندا عانا ءبىزدىڭ ۇكىمەتىمىزدىڭ باسشىسى قازاقستاندا جۇمىس ساپارىمەن بولىپ، اۋقىمدى شارۋالار اتقاردى جانە بارلىق كەزدەسۋلەر بويىنشا ماعان بايانداپ وتىردى. پاندەمياعا قاراماستان ءبىرىنشى جارتى جىلدىقتاعى تاۋار اينالىمى 33 پايىزعا ارتتى. حالىقارالىق ۇيىمداردا، سونىڭ ىشىندە شانحاي ىنتىماقتاستىق ۇيىمى، ەۋرازيالىق ەكونوميكالىق وداق ارقىلى دا بايلانىس ورناتتىق. بارلىق باعىتتار بويىنشا ىلگەرىلەۋشىلىك بار. وداقتاستىق بايلانىستارىمىز نىعايىپ، جاڭا ساپادا تىڭ مۇمكىندىكتەرگە جول اشىلۋدا، – دەدى رەسەي پرەزيدەنتى.
قاسىم-جومارت توقايەۆ ەكىجاقتى ساۋدا-ەكونوميكالىق بايلانىستار مەن ءوڭىرارالىق قاتىناستاردى نىعايتۋدى قولدادى.
– جاڭا عانا ەكىجاقتى تاۋار اينالىمىنىڭ ناقتى سانىن ايتتىڭىز. بۇعان قوسا كورشىلەس وڭىرلەرىمىزدىڭ تاۋار اينالىمى 70 پايىزدى قۇرايتىنىن دا ايتا كەتكەن ءجون. ءوڭىرارالىق ىنتىماقتاستىق فورۋمىندا كەزدەسۋدى جوسپارلاپ وتىرمىز. قازان ايىنداعى كەزدەسۋ جۇزبە-جۇز وتپەسە دە، ونلاين بايلانىستا بولادى. وداقتاس بايلانىستارىمىزعا تىڭ قارقىن بەرەتىن بۇل كەزدەسۋدى جۇرتشىلىق كۇتىپ وتىر، – دەپ اتاپ ءوتتى مەملەكەت باسشىسى.
رەسەي پرەزيدەنتى ءوز كەزەگىندە جاھاندىق جانە ايماقتىق قاۋىپسىزدىكتىڭ وزەكتى ماسەلەلەرىنە ەرەكشە ءمان بەردى.
– ارينە، قازىرگى تاڭدا ەڭ وزەكتى ماسەلە – قاۋىپسىزدىك. اسىرەسە، اۋعانستانداعى جاعداي ۋشىعىپ بارادى. دۇيسەنبى كۇنى ۇجىمدىق قاۋىپسىزدىك شارت ۇيىمى اياسىندا بەينەكونفەرەنسيا رەجيمىندە جينالىپ، پىكىر الماسامىز دەپ ۇمىتتەنەمىن. ودان كەيىن قىركۇيەكتە شانحاي ىنتىماقتاستىق ۇيىمى جانە ۇجىمدىق قاۋىپسىزدىك شارت ۇيىمى اياسىندا جوسپارلى جۇمىسىمىزدى جۇرگىزە بەرەمىز، – دەدى ۆلاديمير پۋتين.
قاسىم-جومارت توقايەۆ تۋىنداپ وتىرعان سىن-تەگەۋرىندەرگە بايلانىستى ەكى ەل اراسىنداعى ءوزارا ءىس-قيمىلداردىڭ ماڭىزدى ەكەنىن اتاپ ءوتتى.
– شىن مانىندە، ءبىز قاۋىپسىزدىك ماسەلەسىنە قاتىستى ساياساتىمىزدى ۇنەمى كەڭەسىپ جۇرگىزەمىز. بۇل ماسەلە، اسىرەسە، اۋعانستانداعى جاعدايعا كەلگەندە اسا وزەكتى. الداعى ءىس-قيمىلدارىمىزدى جۇيەلەۋ ءۇشىن ءسىزدىڭ وسى جاعدايعا قاتىستى پىكىرىڭىزدى بىلگىم كەلەدى، – دەدى قازاقستان پرەزيدەنتى.
