Kún tártibinde Aýǵanstandaǵy jaǵdaıǵa qatysty óńirlik qaýipsizdik, sondaı-aq Qazaqstan men Reseı arasyndaǵy yntymaqtastyq jáne ıntegrasıalyq baılanystar aıasyndaǵy ózara is-qımyl máseleleri qaraldy.
Memleket basshysy Reseı Prezıdentine Máskeýge shaqyrǵany úshin alǵys bildirdi.
– Shyn máninde, bizdiń baılanystarymyz eshqashan toqtaǵan joq. Pandemıa kezinde de onlaın júıesinde jáne telefon arqyly baılanysyp turdyq. Degenmen, júz ret estigennen bir ret kórgen jaqsy, – dedi Qasym-Jomart Toqaev.
Qazaqstan Prezıdenti eki el arasyndaǵy barlyq baǵyttaǵy ózara yntymaqtastyqqa joǵary baǵa berdi.
– Qazaqstan men Reseı – odaqtas elder. Biz únemi halyqaralyq kún tártibindegi ózekti máselelerdi, qaýipsizdikti, ásirese ekijaqty yntymaqtastyqty únemi pysyqtap otyramyz. Elderimiz arasyndaǵy qatynastarymyz strategıalyq áriptestik baǵytynda damyp otyrǵany qýantady, – dedi Memleket basshysy.
Vladımır Pýtın eki el arasyndaǵy tyǵyz baılanystardy atap ótti.
– Bizdiń baılanystarymyz úzilgen joq. Qatynastarymyzdy turaqty, óte joǵary deńgeıde jáne barlyq baǵyttar boıynsha júrgizip kelemiz. Bul – parlamentaralyq jáne úkimetaralyq baılanystar. Jaqynda ǵana bizdiń Úkimetimizdiń basshysy Qazaqstanda jumys saparymen bolyp, aýqymdy sharýalar atqardy jáne barlyq kezdesýler boıynsha maǵan baıandap otyrdy. Pandemıaǵa qaramastan birinshi jarty jyldyqtaǵy taýar aınalymy 33 paıyzǵa artty. Halyqaralyq uıymdarda, sonyń ishinde Shanhaı yntymaqtastyq uıymy, Eýrazıalyq ekonomıkalyq odaq arqyly da baılanys ornattyq. Barlyq baǵyttar boıynsha ilgerileýshilik bar. Odaqtastyq baılanystarymyz nyǵaıyp, jańa sapada tyń múmkindikterge jol ashylýda, – dedi Reseı Prezıdenti.
Qasym-Jomart Toqaev ekijaqty saýda-ekonomıkalyq baılanystar men óńiraralyq qatynastardy nyǵaıtýdy qoldady.
– Jańa ǵana ekijaqty taýar aınalymynyń naqty sanyn aıttyńyz. Buǵan qosa kórshiles óńirlerimizdiń taýar aınalymy 70 paıyzdy quraıtynyn da aıta ketken jón. Óńiraralyq yntymaqtastyq forýmynda kezdesýdi josparlap otyrmyz. Qazan aıyndaǵy kezdesý júzbe-júz ótpese de, onlaın baılanysta bolady. Odaqtas baılanystarymyzǵa tyń qarqyn beretin bul kezdesýdi jurtshylyq kútip otyr, – dep atap ótti Memleket basshysy.
Reseı Prezıdenti óz kezeginde jahandyq jáne aımaqtyq qaýipsizdiktiń ózekti máselelerine erekshe mán berdi.
– Árıne, qazirgi tańda eń ózekti másele – qaýipsizdik. Ásirese, Aýǵanstandaǵy jaǵdaı ýshyǵyp barady. Dúısenbi kúni Ujymdyq qaýipsizdik shart uıymy aıasynda beınekonferensıa rejıminde jınalyp, pikir almasamyz dep úmittenemin. Odan keıin qyrkúıekte Shanhaı yntymaqtastyq uıymy jáne Ujymdyq qaýipsizdik shart uıymy aıasynda josparly jumysymyzdy júrgize beremiz, – dedi Vladımır Pýtın.
Qasym-Jomart Toqaev týyndap otyrǵan syn-tegeýrinderge baılanysty eki el arasyndaǵy ózara is-qımyldardyń mańyzdy ekenin atap ótti.
– Shyn máninde, biz qaýipsizdik máselesine qatysty saıasatymyzdy únemi keńesip júrgizemiz. Bul másele, ásirese, Aýǵanstandaǵy jaǵdaıǵa kelgende asa ózekti. Aldaǵy is-qımyldarymyzdy júıeleý úshin Sizdiń osy jaǵdaıǵa qatysty pikirińizdi bilgim keledi, – dedi Qazaqstan Prezıdenti.
