كارىم ءماسىموۆتىڭ استاناداعى ءزاۋلىم سارايىنىڭ تاعدىرى شەشىلدى، - دەپ حابارلايدى Dalanews.kz.
ۇلتتىق قاۋىپسىزدىك كوميتەتىنىڭ بۇرىنعى ءتوراعاسى، بۇرىنعى پرەمەر-مينيستر كارىم ءماسىموۆتىڭ استاناداعى ءۇيى الەۋمەتتىك قاجەتتىلىككە بايلانىستى اۋكسيوننان الىنىپ تاستالدى. بۇل تۋرالى قايتارىلعان اكتيۆتەردى باسقارۋ كومپانياسى مالىمدەدى
ءۇي قالانىڭ الەۋمەتتىك قاجەتتىلىگى ءۇشىن ساتىلىمنان الىنعان.
"2025 جىلعى 18 ساۋىردە "قايتارىلعان اكتيۆتەردى باسقارۋ كومپانياسى" ج ش س مەملەكەتتىك مۇلىك ءتىزىلىمىنىڭ ۆەب پورتالىنا استانا قالاسى نۇرا اۋدانى قاراوتكەل شاعىناۋدانى ەرەيمەنتاۋ كوشەسى، 1ء-ۇي مەكەنجايىندا ورنالاسقان، جەرتولەسى بار تۇرعىن ءۇيدى ەلەكترون ساۋدا ارقىلى ساتۋ تۋرالى حابارلاما جاريالادى. نىساننىڭ باستاپقى باعاسى 1 685 115 000 تەڭگە بولدى. الايدا باسقارۋشى كومپانيا اتىنا استانا اكىمدىگىنەن بۇل جىلجىمايتىن مۇلىكتى قالانىڭ الەۋمەتتىك قاجەتتىلىگىنە بەرۋ تۋرالى رەسمي سۇرانىس كەلىپ ءتۇستى. الەۋمەتتىك ماڭىزىن جانە زاڭناما تالاپتارىن ەسكەرە وتىرىپ، بۇل نىسان ەلەكترون ساۋدا جوسپارىنان الىندى"، - دەپ جازىلعان حابارلامادا.
نىساندى ءارى قاراي پايدالانۋ ماسەلەسى جەرگىلىكتى اتقارۋشى ورگاننىڭ مۇددەلەرىن ەسكەرە وتىرىپ، بەلگىلەنگەن تارتىپپەن شەشىلمەك.
ايتا كەتەيىك، بۇعان دەيىن ءتيىستى لوت ە-Qazyna ەلەكترون ساۋدا الاڭىنىڭ سايتىندا جاريالانعان ەدى. جەرتولەسى بار تۇرعىن ءۇي ەلوردانىڭ نۇرا اۋدانىندا ورنالاسقان. جالپى اۋدانى 2877،7 شارشى مەتر بولاتىن ەكى قاباتتى ءۇي.
ۇيگە ءارتۇرلى اۋماقتاعى بىرنەشە جەر ۋچاسكەسى كىرەدى، ولاردىڭ بىرىندە گاراج ورنالاسقان. ءۇي 879 دانا مۇلىكپەن بىرگە ساتىلاتىنى ايتىلدى. ولاردىڭ اراسىندا جيھاز، تۇرمىستىق زاتتار، زەرگەرلىك بۇيىمدار، كوللەكسيالىق مونەتالار، كادەسىي رەتىندەگى قارۋلار بار.
