كارىم ءماسىموۆتىڭ ءزاۋلىم سارايى استانا اكىمدىگىنىڭ مەنشىگىنە ءوتىپ، ءبىلىم مەكەمەسىنە اينالادى. بۇل تۋرالى Kursiv.Media-عا قايتارىلعان اكتيۆتەردى باسقارۋ جونىندەگى كومپانيا مالىمدەگەن، - دەپ حابارلايدى Dalanews.kz.

ءۇي مەن جەر تەلىمى استانا اكىمدىگىنىڭ ءبىلىم باسقارماسىنا تەگىن بەرىلەدى.

"مۇلىكتى استانا اكىمدىگى اپپاراتىنىڭ جەەتكشىسى رەسمي وتىنىشپەن سۇراتتى. وندا "استانا قالالىق ءبىلىم باسقارماسى" مەملەكەتتىك مەكەمەسىنىڭ حاتى بار. وتىنىشتە نىساندى الەۋمەتتىك باستامالاردى جۇزەگە اسىرۋ ماقساتىندا پايدالانۋ قاجەتتىگى ايتىلعان"، - دەپ جاۋاپ بەردى قايتقان اكتيۆتەردى باسقاراتىن كومپانيا.

قۇجاتتاردى راسىمدەۋمەن استانا اكىمدىگى اينالىسىپ جاتىر. باسقا دا مەملەكەتتىك مەكەمەلەردەن نەمەسە ۇيىمداردان ءزاۋلىم ۇيگە سۇرانىس تۇسپەگەن.

وسىلايشا ءماسىموۆتىڭ قىمبات جەر تەلىمى استانانىڭ كوممۋنالدىق مەنشىگىنە اينالادى، دەگەنمەن ىشىندەگى مۇلكى ساتىلادى.

ەسكە سالايىق، بۇعان دەيىن ۇلتتىق قاۋىپسىزدىك كوميتەتىنىڭ بۇرىنعى ءتوراعاسى، بۇرىنعى پرەمەر-مينيستر كارىم ءماسىموۆتىڭ استاناداعى ءۇيى الەۋمەتتىك قاجەتتىلىككە بايلانىستى اۋكسيوننان الىنىپ تاستالدى. 

ال وعان دەيىن ءتيىستى لوت ە-Qazyna ەلەكترون ساۋدا الاڭىنىڭ سايتىندا جاريالانعان ەدى. جەرتولەسى بار تۇرعىن ءۇي ەلوردانىڭ نۇرا اۋدانىندا ورنالاسقان. جالپى اۋدانى 2877،7 شارشى مەتر بولاتىن ەكى قاباتتى ءۇي.

ۇيگە ءارتۇرلى اۋماقتاعى بىرنەشە جەر ۋچاسكەسى كىرەدى، ولاردىڭ بىرىندە گاراج ورنالاسقان. ءۇي 879 دانا مۇلىكپەن بىرگە ساتىلاتىنى ايتىلدى. ولاردىڭ اراسىندا جيھاز، تۇرمىستىق زاتتار، زەرگەرلىك بۇيىمدار، كوللەكسيالىق مونەتالار، كادەسىي رەتىندەگى قارۋلار بار.