Kárim Másimovtiń záýlim saraıy Astana ákimdiginiń menshigine ótip, bilim mekemesine aınalady. Bul týraly Kursiv.Media-ǵa Qaıtarylǵan aktıvterdi basqarý jónindegi kompanıa málimdegen, - dep habarlaıdy Dalanews.kz.

Úı men jer telimi Astana ákimdiginiń bilim basqarmasyna tegin beriledi.

"Múlikti Astana ákimdigi apparatynyń jeetkshisi resmı ótinishpen suratty. Onda "Astana qalalyq bilim basqarmasy" memlekettik mekemesiniń haty bar. Ótinishte nysandy áleýmettik bastamalardy júzege asyrý maqsatynda paıdalaný qajettigi aıtylǵan", - dep jaýap berdi qaıtqan aktıvterdi basqaratyn kompanıa.

Qujattardy rásimdeýmen Astana ákimdigi aınalysyp jatyr. Basqa da memlekettik mekemelerden nemese uıymdardan záýlim úıge suranys túspegen.

Osylaısha Másimovtiń qymbat jer telimi Astananyń komýnaldyq menshigine aınalady, degenmen ishindegi múlki satylady.

Eske salaıyq, buǵan deıin Ulttyq qaýipsizdik komıtetiniń burynǵy tóraǵasy, burynǵy premer-mınıstr Kárim Másimovtiń Astanadaǵy úıi áleýmettik qajettilikke baılanysty aýksıonnan alynyp tastaldy. 

Al oǵan deıin tıisti lot E-Qazyna elektron saýda alańynyń saıtynda jarıalanǵan edi. Jertólesi bar turǵyn úı elordanyń Nura aýdanynda ornalasqan. Jalpy aýdany 2877,7 sharshy metr bolatyn eki qabatty úı.

Úıge ártúrli aýmaqtaǵy birneshe jer ýchaskesi kiredi, olardyń birinde garaj ornalasqan. Úı 879 dana múlikpen birge satylatyny aıtyldy. Olardyń arasynda jıhaz, turmystyq zattar, zergerlik buıymdar, koleksıalyq monetalar, kádesyı retindegi qarýlar bar.