ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆتەن قالعان "مۇرا" بىر-بىرلەپ ساتىلعالى جاتىر، - دەپ حابارلايدى Dalanews.kz.
جاڭا دەرەك: ماسىموۆتەن قالعان "مۇرا" تۋرالى نە بەلگىلى؟
كارىم ءماسىموۆتىڭ ۇيىندەگى باعالى زاتتار جەكە اۋكسيون ارقىلى ساتىلۋى مۇمكىن. سوتتالعان ۇقك ەكس-توراعاسى، بۇرىنعى پرەمەر-مينيستر كارىم ءماسىموۆتىڭ استاناداعى سارايىن الەۋمەتتىك قاجەتتىلىككە بەرۋ جوسپارلانىپ وتىر. ەلوردا اكىمدىگى ءۇيدى پايدالانۋعا ءوتىنىش بەرگەن، ءبىراق ول ءالى راستالعان جوق. بۇل تۋرالى قايتارىلعان اكتيۆتەردى باسقارۋ جونىندەگى كومپانيا باسشىسى قۋانىشبەك مۇقاش مالىمدەدى.
قۋانىشبەك مۇقاش ءزاۋلىم ءۇيدىڭ جانە ونداعى باعالى زاتتاردىڭ تاعدىرى تۋرالى ساۋالعا جاۋاپ بەردى.
"بىزدە بالانستا نۇرا اۋدانىندا ورنالاسقان ءۇي بار، اۋماعى - 2000 شارشى مەتر. استانا اكىمدىگى ءوتىنىش ءبىلدىرىپ، ونى الەۋمەتتىك نىسان رەتىندە العىسى كەلدى، ءبىراق ءقازىر ولاردىڭ راستاۋىن كۇتىپ وتىرمىز"، - دەپ ءتۇسىندىردى ول.
قۋانىشبەك مۇقاشتىڭ ايتۋىنشا، ۇيدەگى باعالى زاتتار ساتىلىمعا شىعارىلۋى مۇمكىن.
"ولار بولەك باعالانعاندىقتان، جەكە اكتيۆتەر بولعاندىقتان، ساۋدا-ساتتىققا، اۋكسيونعا بولەك قويىلادى جانە سولاي ساتىلادى دەپ ويلايمىن. بولماسا كەز كەلگەن اكتيۆكە قوسىپ، سونىمەن بىرگە ساتامىز"، - دەدى كومپانيا باسشىسى.
بۇعان دەيىنگى جاعداي
ەسكە سالايىق، بۇعان دەيىن ۇلتتىق قاۋىپسىزدىك كوميتەتىنىڭ بۇرىنعى ءتوراعاسى، بۇرىنعى پرەمەر-مينيستر كارىم ءماسىموۆتىڭ استاناداعى ءۇيى الەۋمەتتىك قاجەتتىلىككە بايلانىستى اۋكسيوننان الىنىپ تاستالدى.
ال وعان دەيىن ءتيىستى لوت ە-Qazyna ەلەكترون ساۋدا الاڭىنىڭ سايتىندا جاريالانعان ەدى. جەرتولەسى بار تۇرعىن ءۇي ەلوردانىڭ نۇرا اۋدانىندا ورنالاسقان. جالپى اۋدانى 2877،7 شارشى مەتر بولاتىن ەكى قاباتتى ءۇي.
ۇيگە ءارتۇرلى اۋماقتاعى بىرنەشە جەر ۋچاسكەسى كىرەدى، ولاردىڭ بىرىندە گاراج ورنالاسقان. ءۇي 879 دانا مۇلىكپەن بىرگە ساتىلاتىنى ايتىلدى. ولاردىڭ اراسىندا جيھاز، تۇرمىستىق زاتتار، زەرگەرلىك بۇيىمدار، كوللەكسيالىق مونەتالار، كادەسىي رەتىندەگى قارۋلار بار.
