تالعاردا مارقۇم شەرزاتتىڭ وتباسى تۇرعان ءۇيدىڭ ورتەنۋىنە قاتىستى ەكىنشى قىلمىستىق ءىس بويىنشا تەرگەۋ جۇمىستارى ءجۇرىپ جاتىر، دەپ حابارلايدى Dalanews.kz.

“سۋرەتتە ولاردىڭ مۇلكىنەن قالعان از عانا زاتتار كورسەتىلگەن. ايماق اكىمى شەرزاتتىڭ اكەسى قارجاۋبايعا ءۇيدى قالپىنا كەلتىرۋگە ۋادە بەرگەن بولاتىن. الايدا تەرگەۋ شارالارىنىڭ سوزىلۋىنا بايلانىستى بۇل ءىس ازىرگە باياۋ ءجۇرىپ جاتىر. سوندىقتان كوپبالالى وتباسىنىڭ قاي ۋاقىتتا ءوز باسپاناسىنا ورالاتىنى بەلگىسىز. قازىرگى ۋاقىتتا ولار تۋىستارىنىڭ ۇيىندە تۇرىپ جاتىر”، - دەپ مالىمدەدى Instagram الەۋمەتتىك جەلىسىندەگى justice_for_sherzat پاراقشاسى.

دەرەككوزدىڭ مالىمەتىنشە، شەرزات بولاتتىڭ وتباسى قارجى جيناۋعا بايلانىستى ەشقانداي حابارلاندىرۋ جاريالاماعان.

“ولاردىڭ اتىنان اقشا جيناپ جاتقان ادامدار – الاياقتار! ەگەر قارجاۋبايدىڭ وتباسىنا قارجىلاي كومەك قاجەت بولسا، بۇل تۋرالى وسى پاراقشادا مىندەتتى تۇردە حابارلايمىز”، - دەدى دەرەككوز.

ەسكە سالايىق، بۇعان دەيىن تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.

كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.

قازىرگى تاڭدا كىنالى دەپ تانىلعان 7 ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.

15 قازاندا ىشكى ىستەر ۆيسە-مينيسترى تاعى ءۇش كۇدىكتىنى ۇستاعانىن ءمالىم ەتتى.

ال 18 قازاندا تاعى ءبىر كۇدىكتىنى قولعا ءتۇسىردى.

سونىمەن قاتار، الماتى وبلىستىق پوليسيا دەپارتامەنتى باستىعىنىڭ مىندەتىن اتقارۋشى شالقاروۆ توبەلەستەن كەيىن قانشا قارۋ تاركىلەنگەنىن ايتتى.

ودان كەيىن شەرزاتتىڭ ۇيىنە كۇزەت قويىلدى.

كوپ ۇزاماي مارقۇم شەرزاتتىڭ ءۇيى ورتەندءى.