مارقۇم شەرزات بولاتتىڭ وتباسىنىڭ ادۆوكاتى سايدا تاۋكەليەۆا ءۇيدى ورتەگەن كۇدىكتىلەردىڭ ءالى كۇنگە دەيىن انىقتالماعانىن جەتكىزدى، دەپ حابارلايدى Dalanews.kz.
“ءبىز وبلىس پروكۋرورىمەن كەزدەستىك، ول تەرگەۋ بارىسى جايلى تولىق اقپارات بەردى. ونىڭ ايتۋىنشا، ءىس اياقتالۋعا جاقىن، سەبەبى قاجەتتى ساراپتامالار مەن پروسەدۋرالار ورىندالعان. دەگەنمەن ازىرگە كۇدىكتىلەر انىقتالعان جوق. تەرگەۋ بارىسىندا ۇلكەن جۇمىس اتقارىلعانىن ايتتى، ءبىراق ناتيجە جوق،” – دەدى ادۆوكات.
ەسكە سالايىق، بۇعان دەيىن تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم كوز جۇمدى. جانجال جىگىتتىڭ وتباسى جالعا الاتىن دۇكەننەن باستالعان. تۋىستارىنىڭ ايتۋىنشا، ساۋدا نۇكتەسىنە كەلگەن ساتىپ الۋشى سىرا الىپ، اقشاسىن تولەۋدەن باس تارتقان. وسى جاعدايدان كەيىن توبەلەس باستالعان.
كامەلەتكە تولماعان بالانى ءولتىرۋ فاكتىسى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى.
قازىرگى تاڭدا كىنالى دەپ تانىلعان 7 ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
15 قازاندا ىشكى ىستەر ۆيسە-مينيسترى تاعى ءۇش كۇدىكتىنى ۇستاعانىن ءمالىم ەتتى.
ال 18 قازاندا تاعى ءبىر كۇدىكتىنى قولعا ءتۇسىردى.
سونىمەن قاتار الماتى وبلىستىق پوليسيا دەپارتامەنتى باستىعىنىڭ مىندەتىن اتقارۋشى شالقاروۆ توبەلەستەن كەيىن قانشا قارۋ تاركىلەنگەنىن ايتتى.
ودان كەيىن شەرزاتتىڭ ۇيىنە كۇزەت قويىلدى.
كوپ ۇزاماي مارقۇم شەرزاتتىڭ ءۇيى ورتەندى.
وسى تۇستا بەلگىلى ساياساتتانۋشى عازيز ابىشيەۆ تالعارداعى توبەلەس كەزىندە قازا تاپقان شەرزات بولاتتىڭ ءۇيىنىڭ ورتەنىپ كەتۋىنە قاتىستى ويىن ايتقان ەدى.
"مۇنىمەن بىرەۋ مەملەكەتكە ءبىر نارسەنى ىمداپ وتىرعان سياقتى: مەملەكەتتىڭ قولىنان تۇك كەلمەيدى، مەملەكەتتىك ەشكىم قۇرمەتتەمەيدى، ەلدە ءتارتىپ ساقتالماي جاتقانىن جانە ءبارى بىرتىندەپ ىدىراپ جاتىر دەگەندى جەتكىزگىسى كەلىپ وتىرعان سياقتى.
بۇگىن ءۇي ورتەندى. ەرتەڭ يتاليالىق مافيالار تۋرالى فيلمدەردەگىدەي سۋديالارمەن، كوميسسارلار مەن شەنەۋنىكتەرمەن توبەلەس باستالا ما؟ الداعى كۇندەرى قىلمىسكەرلەردىڭ قازاقستاننىڭ قاۋىپسىزدىك اپپاراتىنىڭ مۇمكىندىكتەرىنە قانشالىقتى دۇرىس باعا بەرگەنىن كورەمىز"،- دەدى ابىشيەۆ.
