مارقۇم كاسىپكەر باقىت يبراگيموۆتەن تاركىلەنگەن ءۇي ساتىلىمعا قويىلدى، - دەپ حابارلايدى Dalanews.kz. 

شىمبۇلاقتاعى ەكى قاباتتى ءۇي 2020 جىلدىڭ قاراشاسىندا تاركىلەنگەن بولاتىن. عيماراتتى تاركىلەۋ تۋرالى قاۋلىنى المالى اۋداندىق سوتى شىعاردى. 

كوتتەدج بۇرىنعى گورنىي، ءقازىر كەرەي جانە جانىبەك كوشەلەرىندە ورنالاسقان. 

ساۋداعا قويىلعان ءۇيدى ساتىپ الۋشى دا تابىلعان. الايدا ساۋدا ناتيجەسى جويىلعان. ەندى ءۇي قايتادان ساتىلىمعا شىعىپ، 380 ميلليون تەڭگەگە باعالانىپ وتىر. 

ەسكە سالايىق، 2020 جىلى باقىت يبراگيم جومارت ەرتايەۆپەن بىرگە RBK Bank-تە "قارجى جىمقىردى" دەپ سوتتالىپ، 2023 جىلى كۇزدە بوساپ شىققانى كوپشىلىككە ءمالىم.

14 ناۋرىزدا بانكير باقىت يبراگيم وز-وزىنە قول جۇمساعان بولاتىن. بۇعان دەيىن ول Qazaq banki ءىرى بانكىن باسقارىپ، ءتىپتى ونىڭ اكسيونەرى بولعان. وقيعا ورىن العان كۇنى الماتى پوليسيا دەپارتامەنتى قايعىلى جايتتى راستاعان ەدى. سونىمەن قاتار سۋيسيد بولعانىن مالىمدەدى. باقىت يبراگيموۆ 1985 جىلى 28 مامىردا تۋعان. 

كاسىپكەردىڭ جەكە ومىرىنە قاتىستى مالىمەت جوقتىڭ قاسى. كەي مالىمەتتەردە ونىڭ بۇرىنعى ايەلى مەرۋەرت ءابدىر ەكەنى ايتىلادى. مەرۋەرت ءابدىر – باقىتجان ساعىنتايەۆتىڭ ۇلكەن قىزى.