ءتىپتى كوزىنە جاس الىپ، حالىقتان، ارىپتەستەرىنەن جانە تۋىستارىنان كەشىرىم سۇرادى. قاتەسىن تۇسىنەتىنىن جانە كىناسىن تولىقتاي مويىندايتىنىن دا مالىمدەدى.
سوت ۇكىمى بۇگىن جاريالانباق. بۇعان دەيىن پروكۋرور كۇدىكتىگە 90 ملن تەڭگە ايىپپۇل تولەتۋدى سۇراعان بولاتىن. سونداي-اق مەملەكەتتىك ماراپاتتارىنان ايىرۋ ءۇشىن پرەزيدەنتتىڭ اتىنا ۇسىنىس حات دايىنداۋدى تالاپ ەتكەن.
الايدا ەرلان ءبىلالدىڭ ءوزى ونى ماراپاتىنان ايىرماۋدى سۇراپ وتىر.
"جازا رەتىندە ايىپپۇلدى وتەۋگە ءازىرمىن، الايدا ەڭبەكپەن كەلگەن ماراپاتتارىمنان ايىرماساڭىزدار ەكەن. بۇل مەنىڭ ءارى قاراي دا شىعارماشىلىقپەن اينالىسۋىما دەمەۋ بولار ەدى. شىعارماشىلىق ادامعا اتاق-داڭقىنان ايىرىلۋدان اۋىرى جوق"، – دەدى ءبىلال.
سونىمەن بىرگە ءبىلال سوتتان وتباسىلىق جانە قارجىلىق جاعدايىنا بايلانىستى ايىپپۇل كولەمىن ازايتۋدى سۇراۋدا.
"ايىپپۇل كولەمىن ازايتۋدى قاراستىرساڭىز ەكەن. قاتەلەستىم، قاتتى وكىنەمىن. مەنىڭ قازىرگى جاعدايىما تۇسىنىستىكپەن قاراۋدى سۇرايمىن. ءبارىمىز پەندەمىز. قاتەلەسۋ قانىمىزدا بار. قولداۋلارىڭىز عانا قاجەت، ەلىمنىڭ دامۋى جولىندا ءارى قاراي دا تەر توگۋگە ءازىرمىن"، – دەدى ول.
ايتا كەتەيىك، كۇدىكتىگە قاتىستى قىلمىستىق كودەكستىڭ ەكى بابى بويىنشا قىلمىستىق ءىس قوزعالعان.
تانىمال اكتەر جاڭا جىلدىڭ العاشقى كۇندەرى پارا الماق بولدى دەگەن ايىپپەن ءىستى بولعان ەدى.
جەمقورلىققا قارسى ۇلتتىق بيۋرو قىزمەتكەرلەرى ونى تەاتردىڭ كورەرمەن زالىن جالعا بەرۋ ءۇشىن زاڭدى تۇلعالاردىڭ بىرىنەن 1،5 ملن تەڭگە كولەمىندە پارا تالاپ ەتتى دەگەن كۇدىكپەن قۇرىقتادى.
