اۋداننىڭ الەۋمەتتىك-ەكونوميكالىق دامۋ كورسەتكىشىن بايانداعان اۋدان اكىمى ع.يسمايلوۆ بيىلعى جىلى 131،4 مىڭ گەكتارعا ەگىن ەگىلگەنىن اتاپ ءوتتى. ونىڭ ىشىندە 94 مىڭ گەكتارعا ماقتا، 368،4 گەكتارىنا كۇنباعىس، 85 گا كارتوپ، 24 مىڭ گەكتاردان استام جەرگە باقشا ونىمدەرى، ال 2417،3 گا كوكونىس، 56 گەكتارعا ءجۇزىم مەن تاعى باسقا دا ونىمدەر ەگىلگەن. ماقتارالدىق ديقاندار ەگىلگەن 18،4 مىڭ گەكتار قاۋىننان بۇگىندە 19 مىڭ توننادان استام باقشا داقىلىن جيناپ، ونىڭ 70 پايىزىن شەتەلگە ەكسپورتتاسا، قالعان 30 پايىزىن قازاقستان نارىعىنا ساۋدالاعان.
ەڭ الدىمەن وبلىس باسشىسى ەرتە كوكتەمنەن ەگىنىن ەگىپ، مول ءونىم جيناپ قازاقستان مەن شەتەل نارىعىنا شىعارىپ جاتقان ماقتارال اۋىلدىق وكرۋگىندەگى جەكە كاسىپكەر ا.بويەۆتىڭ باۋ-باقشاسىمەن تانىستى. مۇنداعى باۋدىڭ 8 گەكتارىنا الما مەن الحورى، 1 گەكتارىنا انار، 20 گەكتار جەرىنە ءجۇزىم وتىرعىزىلعان.
بيىل «حامرو اتا» شارۋا قوجالىعى شاعىن 18 قوجالىقتى بىرىكتىرىپ، كووپەراسيا قۇرىپ وتىر. وسىنىڭ نەگىزىندە ەڭبەك ونىمدىلىگىن ارتتىرىپ مول تابىس تابۋدى كوزدەپ وتىرعان شارۋالار مەملەكەتتەن بولىنەتىن ءارتۇرلى جەڭىلدىكتەر مەن سۋبسيدياعا جانە ليزينگ ارقىلى جاڭا تەحنيكاعا قول جەتكىزىپ وتىرعاندارىن ايتادى. كووپەراتيۆتىڭ جالپى جەر كولەمى 339،4 گەكتار بولسا، ونىڭ 6 گەكتارىنا جىلىجاي، 274،4 گەكتار جەرىنە ماقتا، 15 گەكتارعا قاۋىن، 20 گەكتارعا جوڭىشقا، 10 گەكتار جەرگە جۇگەرى، 8 گەكتارعا جەمىس-جيدەك، 1 گەكتارعا انار، 20 گەكتارعا ءجۇزىم ەگىلگەن. بۇدان بولەك، «حامرو اتا» فەرمەرلىك قوجالىعىندا مال بورداقىلاۋ الاڭى دا بار. ونداعى 220 باس ءىرى قارا مالدىڭ جارتىسى بورداقىلانۋدا.
شارۋا قوجالىقتىڭ جۇمىسىمەن تانىسقان ايماق باسشىسى، مۇنداعى اتقارىلىپ جاتقان جۇمىسقا وڭ باعا بەرىپ، وزگەلەرگە ونەگە بولۋى ءۇشىن اتالعان قوجالىقتا سەمينار وتكىزۋدى سالا باسشىلارىنا تاپسىردى.
مۇنان بولەك، اكىم ج.ەرالييەۆ اۋىلدىق وكرۋگىندەگى اپاتتى جاعدايدا تۇرعان «تاۋەلسىزدىكتىڭ 20 جىلدىعى» اتىنداعى كانال جانە ونىڭ ۇستىنەن وتەتىن كوپىردىڭ ماسەلەسىمەن تانىستى. سونىمەن قاتار، اتالعان اۋىلدىق وكرۋگتەگى «نۇرالى جول» شارۋا قوجالىعىنىڭ ماقتا مەن باقشا ەگىس القابىن ارالاپ كوردى. ءوڭىر حالقىن جەمىس-جيدەك، كوكونىستەرمەن جانە باقشا ونىمدەرىمەن قامتۋ ماقساتىندا بارىنشا جۇمىس ىستەۋ قاجەتتىگىن ايتقان وبلىس اكىمى شارۋالارعا بەرىلەتىن مەملەكەتتىك كومەك پەن قولداۋدى دەر كەزىندە كورسەتۋدى جانە سۋبسيديا الۋدا قۇجاتتارىن راسىمدەۋ جۇمىستارىن ۇيلەستىرۋدى اۋدان اكىمدىگىنە مىندەتتەدى.
1997 جىلى قۇرىلعان قوجالىقتىڭ جالپى جەر كولەمى 497 گەكتارعا جەتسە، ونىڭ ىشىندە 210 گەكتارى ماقتا، 213 گەكتارى باقشا. ال، 50 گەكتار جەرىنە جوڭىشقا، 27 گەكتارعا داندىك جۇگەرى وتىرعىزعان.
ساپارى بارىسىندا ج.تۇيمەبايەۆ ايالداعان كەلەسى نىسان «حايات ر.ۋ.ج.» ءجشس-نىڭ اياق كيىم فابريكاسى بولدى. تۇركيادان الىپ كەلگەن جاڭا جابدىعىن 2 اي بۇرىن عانا ىسكە قوسقان فابريكا، ءونىمىن 2 ەسە ارتتىرىپ، جىلىنا 1 ملن. جۇپ جازدىق جانە قىستىق اياق كيىمدەر شىعارۋدا. ءوندىرىس ورنى يمپورت ورنىن باسىپ قازاقستان نارىعىن قامتىپ جاتىر. جوبانىڭ جالپى قۇنى 675 ميلليون تەڭگەنى قۇراسا، «بيزنەستىڭ جول كارتاسى – 2020» باعدارلاماسى اياسىندا 100 ميلليون تەڭە نەسيە العان.
سونىمەن قاتار، اكىم كۇنى كەشە ىسكە قوسىلعان «نۇراي» سپورتتىق ساۋىقتىرۋ كەشەنىن ارالاپ كوردى. نەمىس تەحنولوگياسى نەگىزىندە سۋدى جىلىتۋ جانە تازالاۋ جۇيەسىمەن قامتىلعان 25ح10 مەترلىك باسسەينى بار كەشەن ءبىر مەزەتتە 100 ادامدى قامتي الادى. سونداي-اق، فيتنەس زالى، تۇرىك حامامى جانە فين ساۋناسى، سپورتتىق تاعامدار اسحاناسى، تەننيس پەن بيليارد زالى، كاراوكە، 3 جۇلدىزدى قوناق ءۇيى بار.
