ەتنوموفاگ ءوندىرىسىن جولعا قويعان كاسىپورىن بىلتىر ماقتا داقىلىنىڭ زيانكەستەرىنە قارسى 50 كگ تريحوگرامما، 7 ملن. دانا التىنكوز، 9 ملن. دانا گابروبراكون جاندىكتەرىن ءوندىرىپ، شارۋا قوجالىقتارىنا ءوز پايداسىن تيگىزگەن ەكەن.
بيىل دا ءوز كومەگىن اياماي، شارۋالار قاۋىمى شىعىنعا ۇشىراماۋى ءۇشىن اتالعان كاسىپورىن اۋقىمدى جۇمىس اتقارعان.
اتالعان ۇيىمنىڭ جۇمىسىمەن تانىسقان "قالا مەن دالا" تىلشىلەرى ەلىمىزدەگى اق ماقتانى وسىرەتىن جالعىز ءوڭىر بولىپ تابىلاتىن تۇركىستان وبلىسىنداعى بۇل مەكەمەنىڭ اتقارار ءرولى وراسان ەكەنىنە كوز جەتكىزىپ قايتتى.
ايتا كەتەلىك، تۇركىستان ءوڭىرىنىڭ اكىمى جانسەيىت تۇيمەبايەۆتىڭ اتاپ وتكەنىندەي وبلىستا بيىلعى جىلى ماقتا داقىلى 123 مىڭ گەكتاردان استام جەرگە ەگىلسە، ونىڭ 87 مىڭ گەكتارعا جۋىعى ماقتاارال اۋدانىنا تيەسىلى ەكەن.
اكىمنىڭ ايتۋىنشا، بيىل وڭىردە تۇقىمدىق شيت تاپشىلىعى سەزىلمەگەن. ماسەلەن، ماقتاارالدىڭ وزىندە 3 مىڭ توننا شيت دايىندالعان. بۇدان بولەك، اۋدانعا جۇڭگو مەن تۇركيا ەلدەرىنەن دە تۇقىمدىق شيت تاسىمالدانىپتى.
