ماقتانىڭ باعاسى انىقتالىپ، ەڭ العاشقى بولىپ "مىرزاكەنت" ماقتا زاۋىتى اق التىنىڭ تونناسىن 170 مىڭ تەڭگەدەن بەلگىلەدى. باسەكەلەستىك ورتادا ماقتانىڭ باعاسى 200 مىڭ تەڭگەگە دەيىن كوتەرىلەدى دەگەن بولجام بار.
بۇگىندە اۋدانداعى ماقتا قابىلداۋ بەكەتتەرىنە 5 مىڭ توننادان استام اق التىن كەلىپ تۇسكەن بولسا، ديقاندار تەرىم بىتكەنشە 80 مىڭ توننا اق ۇلپا جيناپ الۋدى كوزدەپ وتىر. ول ءۇشىن 145 تەرىمشىلەر بريگاداسى، 10-نان اسا كومباين ماقتا تەرۋ ناۋقانىنا جۇمىلدىرىلعان.
ماقتانىڭ تەزىرەك اشىلۋى ءۇشىن اۋداندا ءقازىردىڭ وزىندە 25 مىڭ گەكتاردان استام ماقتالىق القاپقا دەفولاسيا شارالارى جاسالعان. «دروب پليۋس»، «اۆگۋرون ەكسترا»، «كوتتون»، «رەگلون-سۋپەر» حيميكاتتارىنىڭ ماقتا جاپىراعىن تۇسىرۋدگە ءتيىمدى اسەرى بايقالۋدا.
«كوسەكتەرگە كۇن جاقسى تيگەن سوڭ تەزىرەك اشىلىپ جاتىر. كوپتەگەن شارۋالار دەفولياسيانىڭ پايداسىن بىلمەيدى. «ماقتا سالماق جوعالتادى» دەپ ونى جاساۋدان قاشادى. كوك كوسەكتەر كۇزدە ۇسىك شالعاندا ءبىر-اق اشىلادى. ونداي ماقتانىڭ ساپاسى دا بولمايدى» - دەدى ماقتاسىن جيناپ جاتقان شارۋانىڭ ءبىرى م.زابىنبەكوۆ.
اۋداندا ماقتا وندىرەتىن 5 زاۋىت جانە ماقتا قابىلدايتىن 69 بەكەت قىزمەت كورسەتۋدە. زاۋىتتاردىڭ ىشىندە تمد-دا تەڭدەسى جوق سانالاتىن «مىرزاكەنت» ماقتا وڭدەۋ زاۋىتى 120 ادامدى تۇراقتى جۇمىس ورنىمەن قامتىپ وتىر. جالپى قۇنى 1 ميلليارد تەڭگەنى قۇرايتىن ءوندىرىس وشاعىنىڭ جوعارى تەحنولوگيالىق قۇرال-جابدىقتارى اقش-تىڭ «ليۋمۋس كورپورايشن» كومپانياسىنان ساتىپ الىنىپ، مونتاجدالعان.
وندىرىستىك قۇاتتىلىعى 60 مىڭ توننانى قۇرايدى. قولدانىستاعى ماقتا زاۋىتتارىمەن سالىستىرعاندا بۇل ءوندىرىستىڭ ەڭبەك ونىمدىلىگى 30 پايىزعا جوعارى. اتاپ ايتقاندا، تالشىقتىڭ شىعۋى 30 پايىزعا ارتىق ءارى ساپاسى جوعارى، ەلەكتر قۋاتىنىڭ شىعىنى 25-30 پايىزعا ۇنەمدەلەدى جانە ماقتانى وڭدەۋ مەرزىمى 30 پايىزعا قىسقارعان.
زاۋىت ماماندارىنىڭ ايتۋىنشا، بيىل ماقتانىڭ ءتۇسىمى، تالشىعىنىڭ ۇزىندىعى، ءشيتىنىڭ ساپاسى ويداعىداي. ءبىراق زەرتحانا تەكسەرۋى كەزىندە ماقتانىڭ لاستىعى مولشەردەن كوبەيىپ كەتۋدە. سەبەبى، تەرىمشىلەر قاۋاشاق، كوك جاپىراق، ءشوپ-شالامدى ارالاستىرىپ تەرەدى. سول ءۇشىن زاۋىت باسشىلارى ماقتاشىلاردى تازا ءونىم جيناۋعا شاقىرۋدا.
ماقتاارال اۋدانى اكىمىنىڭ باسپا ءسوز قىزمەتى
