ماقتاارال اۋدانىندا «رۋحاني كەلىسىم» كۇنىنە ارنالعان ءدىني بىرلەستىكتەردىڭ جەتەكشىلەرىمەن كەزدەسۋ جيىنى ءوتتى. ءىس-شاراعا اۋدان اكىمى اپپاراتىنىڭ باسشىسى ن.ساتتاروۆ، اۋداندىق ىشكى ساياسات، مادەنيەت جانە تىلدەردى دامىتۋ ءبولىمى باسشىسىنىڭ مىندەتىن اتقارۋشى ءا.تۇرسىنحانوۆ، اۋداندىق ارداگەرلەر كەڭەسىنىڭ ءتوراعاسى س.وڭعاروۆ جانە ءدىني بىرلەستىكتەردىڭ جەتەكشىلەرى قاتىستى.

 

جيىندى جۇرگىزگەن اپپارات باسشىسى ن.ساتتاروۆ:

– حالىقارالىق رۋحاني كەلىسىم كۇنى العاش رەت 1992 جىلعى 18 قازاندا وتكىزىلدى. سودان بەرى بۇل كۇن – قازاقستانداعى الەۋمەتتىك ماڭىزدى كۇندەردىڭ ءبىرى. ۇلتىمىز بەن ءدىني سەنىمگە قاراماستان بارلىعىمىزدى بىرىكتىرەتىن وسى كۇن – قوعامداعى تۇراقتىلىق پەن كەلىسىم كۇنى. سوندىقتان دا بىرلىك پەن قايىرىمدىلىق، جاقسىلىق پەن گۇلدەنۋ مەرەكەسى رەتىندە اتاپ وتىلەدى. تۇتاستاي الساق، ءدىني احۋال تۇراقتى. اۋداندا ءدىني نەگىزدەگى جانجالدار جانە ءدىني ەكسترەميزم مەن كونفەسسياارالىق الاۋىزدىقتى جاعۋ دەرەكتەرى تىركەلمەگەن. ءقازىر اۋداندا 27 ءدىني بىرلەستىك بار. ولاردىڭ جەتەكشىلەرى ەلباسىمىز بەن ۇكىمەتتىڭ ساياساتىنا، جەرگىلىكتى اتقارۋشى ورگانداردىڭ باستامالارىنا وڭ كوزبەن قارايدى، – دەدى.

ءماجىلىستىڭ كۇن تارتىبىندە اۋداندىق ورتالىقتاندىرىلعان كىتاپحانالار جۇيەسى باسشىسىنىڭ ورىنباسارى پ.ەسەنبەكوۆتىڭ «رۋحاني كەلىسىم» كۇنىنە ارنالعان حابارلاماسى تىڭدالدى. سونداي-اق، اۋداندىق ءدىني بىرلەستىكتەردىڭ جەتەكشىلەرى «رۋحاني كەلىسىم» كۇنىنە ارنالعان باياندامالار جاسادى.

جيىن سوڭىندا مەرەكەگە ارنالعان اۋدان اكىمىنىڭ سىي-سياپاتى تابىستالىپ، ءدىني بىرلەستىكتەردىڭ جەتەكشىلەرى العىس حاتتارمەن ماراپاتتالدى.

 

 

ماقتاارال اۋدانى اكىمىنىڭ باسپا ءسوز قىزمەتى