تۇركىستان وبلىسى ماقتاارال اۋدانىندا قازاقستان مەن تۇركيانىڭ بىرلەسكەن كاسىپورىندارى ماقتا مايىن شىعاراتىن زاۋىتى ىسكە قوسپاقشى. جالپى قۇنى 2،152 ميلليارد تەڭگەنى قۇرايتىن كاسىپورىن 2022 جىلى پايدالانۋعا بەرىلەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

ماقتاارال اۋىلدىق وكرۋگىنە قاراستى كوكارال اۋىلىندا ىسكە اسىپ جاتقان ينۆەستيسيالىق جوبا جىلىنا 3 مىڭ توننا ماي، 14 مىڭ توننا شروت شىعاراتىن مۇمكىندىككە يە. ونەركاسىپتە 48 ادام جۇمىسپەن قامتىلادى.

قازىرگى تاڭدا ماقتا شيكىزاتىن دايىن ونىمگە دەيىن جەتكىزەتىن ونەركاسىپ كۇردەلى جوندەۋدەن ءوتىپ جاتىر. تۇركيا مەملەكەتىنەن بىرنەشە تونناعا جەتەتىن قۇرال-جابدىقتارى اكەلىنگەن.

بۇدان بولەك، 2024 جىلعا دەيىن تۇركيا مەملەكەتىمەن بىرگە جالپى قۇنى 6 ميلليارد تەڭگەنى قۇرايتىن تەكستيل فابريكاسى سالىنباقشى. وندا جىلىنا 6600 توننا ءجىپ ءيىرىپ، 143 ادامدى جۇمىسپەن قامتىلادى. ءارى قاراي ونى كيىم-كەشەككە، كورپە-كىلەمگە اينالدىراتىن تولىق يندۋستريا جاساۋ كوزدەلگەن.

ايتا كەتەيىك، شەتەلدەن تىكەلەي ينۆەستيسيا تارتۋ باعىتىندا 2021-2025 جىلى ماقتاارال اۋدانىندا جالپى ينۆەستيسيا كولەمى 10،781 ميلليارد تەڭگەنى قۇرايتىن 308 ادامدى تۇراقتى جۇمىس ورنىمەن قامتۋدى كوزدەگەن 5 جوبا ىسكە اسىرىلۋدا.