جيىندى اشىپ بەرگەن اۋدان اكىمى باقىت اسانوۆ ەلىمىزدىڭ بۇگىنگى جەتىستىگى اتا زاڭىمىزبەن تىكەلەي بايلانىستى ەكەنىن اتاپ ءوتتى.
– كونستيتۋسياداعى ءبىزدىڭ مەملەكەتىمىز ءۇشىن ەڭ قىمبات قازىنا – ادام، ونىڭ ءومىرى، قۇقىقتارى مەن بوستاندىقتارى بولىپ تابىلادى دەگەن ەرەجەسى بۇلجىماس ورىنعا يە. اتا زاڭ مەرەكەسى اياسىندا جانە ءبىلىم كۇنىنە وراي اۋدانىمىزدا جاڭادان سالىنعان 4 مەكتەپ عيماراتى پايدالانۋعا بەرىلدى. جىل سوڭىنا دەيىن تاعى 1 مەكتەپ حالىق يگىلىگىنە بەرىلەتىن بولادى. سونداي-اق، 2 مەكتەپ، 2 ەمحانا بوي كوتەرۋدە. ءقازىردىڭ وزىندە اۋدانداعى ماقتاارال اۋىلدىق وكرۋگىنە قاراستى 9 ەلدىمەكەندە گاز تارتۋ قۇرىلىسىنىڭ جۇمىستارى ءجۇرىپ جاتىر. نەگىزگى كۇن كورىسى اۋىلشارۋاشىلىعى بولىپ تابىلاتىن اۋداندا 40 مىڭ گەكتار جەردىڭ قۇنارلىعىن ارتتىرۋ ءۇشىن پۋيد-2 جوباسى ارقىلى تىك درەناجداردى ۇڭعىمالاردىڭ قۇرىلىسى مەن كوللەكتورلاردى تازالاۋ جۇمىستارى دا قارقىن العان. شارۋالارىمىز باقشا ونىمدەرىن ەگىپ، ءونىمىن ەلىمىزگە، شەتەلدەرگە شىعارىپ ساتۋدا. ەندى تاياۋ كۇندەرى ماقتا جيناۋ ناۋقانى دا باستالادى. ارينە، ەل ىشىندەگى ۇلى قۇندىلىقتاردى ۇلىقتاعان ۇلى قۇجاتتىڭ ەلگە ىرىس، جاقسى تۇرمىس اكەلىپ وتىرعانى ايقىن. ەلىمىز قول جەتكىزگەن بارلىق جەتىستىك پەن جەڭىسىمىز وسى كونستيتۋسيانىڭ ارقاسى دەپ بىلەمىز، – دەدى باقىت ءناسىرحان ۇلى.
جيىن بارىسىندا ءوڭىر باسشىسى ەل يگىلىگى ءۇشىن بەلسەندى قىزمەت ەتىپ جۇرگەن ازاماتتار مەن مەملەكەتتىك قىزمەتكەرلەردى ارنايى وبلىس اكىمى جانسەيىت قانسەيىت ۇلى تۇيمەبايەۆتىڭ جانە ءوزىنىڭ العىس حاتىمەن ماراپاتتادى. سونداي-اق، 6 اۋىلدىق وكرۋگتىڭ اكىمدەرىنە قىزمەتتىك اۆتوكولىكتىڭ كىلتىن تابىستادى.
سالتاناتتى ءىس-شارانىڭ سوڭى كونسەرتتىك باعدارلاماعا ۇلاسىپ، ماقتالى ولكەنىڭ جەزتاڭداي انشىلەرى پاتريوتتىق اندەر شىرقاپ، بيشىلەرى ونەرلەرىن ورتاعا سالدى.
ماقتاارال اۋدانى اكىمىنىڭ باسپا ءسوز قىزمەتى
