ەسكە سالساق، ايماق باسشىسى جانسەيىت تۇيمەبايەۆ ماقتاارال اۋدانىنا جاساعان ساپارىندا يەسىز قالعان سۋ ارنالارىن مەملەكەت مەنشىگىنە ياعني، «قازسۋشار» مەكەمەسىنىڭ قۇزىرىنا بەرۋدى، ونى تازالاۋ، رەتتەۋ جۇمىستارىن جۇرگىزۋدى تاپسىرعان بولاتىن.
وسىعان وراي، بۇگىندە وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسى ماقتاارال اۋدانىندا جالپى ۇزىندىعى 103 شاقىرىم بولاتىن 51 كوللەكتوردى تازالاۋ جۇمىستارىن باستاپ جىبەردى. تازالاۋ جۇمىستارى الداعى ءبىر ايدىڭ ىشىندە اياقتالۋى ءتيىس.
جالپى، ماقتاارال اۋدانىندا كولەكتورلىق جۇيەلەردىڭ ۇزىندىعى 700 شاقىرىمدى قۇرايدى. سونىڭ 400 شاقىرىمى 15-20 جىلدان بەرى تازالانباي، قامىس باسىپ كەتكەن بولاتىن. اعىن سۋ جىبەرۋ قابىلەتتەلىگىنەن ايىرىلعان كوللەكتورلار تولىعىمەن تازالانسا، وڭىردە اعىن سۋ تاپشىلىعى ەداۋىر ازايادى دەپ وتىر ماماندار.
سونداي-اق، كوللەكتورلار جۇيەسىن تازارتۋمەن قاتار، وندا اعاتىن سۋدى تازا سۋمەن ارالاستىرىپ، ناسوستار ارقىلى قايتا پايدالانۋ قاراستىرىلۋدا. ول ءۇشىن 30 ناسوس ساتىپ الىنعان. تىك درەناجداردان اعاتىن سۋدىڭ قۇرامىن انىقتاپ، ولاردى قايتا پايدالانۋ – بۇل جازعى سۋدان جىل سايىن تاپشىلىق كورەتىن ماقتاارالدىقتار ءۇشىن ءتيىمدى بولماق.
ال ەكسكاۆاتورلارعا قيىندىق تۋعىزاتىن ۇلكەن كوللەكتورلار جۇيەسىن تازالاۋ ءۇشىن «ۆاتەر-ماستەر» دەپ اتالاتىن تەحنيكانى قاراعاندى وبلىسىنداعى ق.ساتبايەۆ كانالىن قازىپ جاتقان جەرىنەن ارنايى الدىرتىپتى. تەحنيكانىڭ تيىمدىلىگى سول – 4-5 ەكسكاۆاتوردىڭ جۇمىسىن ءبىر ءوزى اتقارا الادى.
«بۇل تەحنيكانىڭ ماستەرلەرى دە - قاراعاندىلىقتار. وسىنىڭ ارقاسىندا كۇنىنە 300 مەتردەي جەر تازالانىپ جاتىر. ءبىزدىڭ ماقساتىمىز – 2017 جىلى ماقتاارال اۋدانىنداعى بارلىق كوللەكتورلار جۇيەسىن تازالاپ شىعۋ»، – دەيدى ق ر سۋ رەسۋرتارى كوميتەتىنىڭ ءتوراعاسى يسلام ابىشيەۆ.
ايتا كەتەيىك، اۋداندا 300-گە جۋىق تىك درەناج قازسۋشاردىڭ بالانسىندا بولسا، بۇگىندە سونىڭ 260-ى جۇمىس ىستەپ تۇر. 40 شاقتىسى بيىل قايتا جوندەۋدەن ءوتىپ، ىسكە قوسىلماق. سونداي-اق، 212 تىك درەناج يسلام دامۋ بانكى ارقىلى جوندەۋدەن وتكىزىلىپ، پۋيد-2 جوباسى بويىنشا 149 تىك درەناج جۇمىسىن باستاماق.
سونداي-اق، بيىل وڭىرىمىزدەگى 37 شاقىرىمدىق 12 سۋ نىساندارىنا وبلىستىق بيۋدجەتتەن 1 ملرد. تەڭگە قارجى قارالىپ وتىر. ەۆروپا قايتا قۇرۋ جانە دامۋ بانكىنىڭ قارجىلاندىرۋىمەن شاردارا اۋدانىنداعى جاۋشىقۇم القابىن سۋلاندىرۋ ءىسى دە قولعا الىنۋدا. جوبا تولىعىمەن ىسكە اسسا، شاردارا اۋدانىندا قوسىمشا 10 مىڭ گەكتار سۋارمالى جەردى اينالىمعا قوسۋعا مۇمكىندىك تۋادى.
جوعارىداعى اتالعان جۇمىستار اياقتالسا، وبلىسىمىزداعى 3005 گەكتار سۋارمالى جەردىڭ جاعدايى ەداۋىر جاقسارا تۇسەتىن بولادى. ودان بولەك، 1000 گەكتار سۋارمالى جەر جاڭادان اينالىمعا قوسىلماق.
وقو اكىمىنىڭ باسپا ءسوز قىزمەتى
