ماڭعىستاۋلىق دارىگەرلەر مەن ستۋدەنتتەر تۇركيادا تەگىن تاعىلىمدامادان ءوتىپ، بىلىكتىلىگىن ارتتىرادى،- دەپ حابارلايدى Dalanews.kz
ماڭعىستاۋ وبلىسىنىڭ اكىمى نۇرداۋلەت قيلىبايدىڭ تاپسىرماسىنا سايكەس ستامبۇل قالاسىنا بارعان ماڭعىستاۋ وبلىسى اكىمىنىڭ ورىنباسارى اببات ورىسبايەۆ ءبىرقاتار كەلىسىمگە قول جەتكىزدى.
اتاپ ايتساق، 100 ماڭعىستاۋلىق ستۋدەنت تۇركيانىڭ انتاليا جانە مارماريس قالالارىندا تۋريزم سالاسى بويىنشا تەگىن تاعىلىمدامادان وتەدى. سونىمەن قاتار، 50-گە جۋىق دارىگەر Medicana Health Group كلينيكاسىندا كاسىبي بىلىكتىلىگىن جەتىلدىرەدى.
ماڭعىستاۋ وبلىستىق ءبىلىم باسقارماسى مەن تۇركيانىڭ «كۋرورتتىق ايماق» تۋريستىك قىزمەت ساۋداسى اق اراسىندا جاسالعان مەموراندۋم ايماقتاعى تۋريزم جانە سەرۆيس سالاسىنا بىلىكتى ماماندار دايارلاۋدى كوزدەيدى. وسى كەلىسىم اياسىندا ماۋسىم ايىنان باستاپ مارماريس قالاسىنداعى Woxx Hotels Group 50 ستۋدەنتتى وقىتىپ، تاجىريبە الماسۋعا مۇمكىندىك بەرەدى. تاعى 50 ستۋدەنت انتاليادا كاسىبي ءبىلىمىن جەتىلدىرەدى. بارلىق تاعىلىمداماشىلار تەگىن تاماقپەن قامتاماسىز ەتىلىپ، ولارعا ايلىق تولەنەدى.
سونداي-اق، وبلىس اكىمىنىڭ ورىنباسارى Medicana Health Group باسقارما مۇشەسى بەرك بوزكۋرتپەن كەلىسسوزدەر جۇرگىزىپ، ارىپتەستىك ورناتۋ تۋرالى كەلىسىمگە كەلدى. بۇل كەلىسىم اياسىندا 20 ونكولوگ جانە وبلىستىڭ ءار مەديسينالىق ۇيىمىنان 30-عا جۋىق دارىگەر ءتۇرلى مەديسينالىق باعىتتار بويىنشا تاجىريبە جيناقتايدى.
Medicana Health Group – تۇركيانىڭ جەتەكشى مەديسينالىق ۇيىمدارىنىڭ ءبىرى. قۇرامىنا 14 اۋرۋحانا، 11 مەديسينالىق ورتالىق جانە 500-دەن استام ەمحانا كىرەدى. جىل سايىن 10 ميلليوننان استام ناۋقاسقا قىزمەت كورسەتەتىن بۇل توپ جوعارى تەحنولوگيالىق ەمدەۋ ادىستەرىن ۇسىناتىن مەديسينالىق تۋريزم سالاسىنىڭ كوشباسشىسى رەتىندە تانىمال.
