ماڭعىستاۋ وبلىسىندا "ءۇستىرت" شەكارا بولىمشەسىنىڭ 26 جاستاعى باستىعى قىزمەتىنە سالعىرت قاراعانى ءۇشىن 2 جىلعا باس بوستاندىعىنان ايىرىلدى. ونىڭ ارەكەتسىزدىگى سالدارىنان مەرزىمدى اسكەري قىزمەتشى قازا تاپقان، دەپ حابارلايدى Dalanews.kz.

قايعىلى وقيعا 2025 جىلدىڭ قازان ايىندا بولعان. ەركەبۇلان ساعىندىقوۆقا ديزەل گەنەراتورىنىڭ رادياتورىن جۋۋ ءۇشىن بەنزين اكەلۋ تاپسىرىلعان. سارباز قويما اۋماعىنداعى سيستەرناعا كوتەرىلىپ، رەزەرۆۋاردىڭ قاقپاعىن اشىپ، كانيسترگە جانارماي قۇيا باستاعان.

سول ساتتە ول اشىق سيستەرناعا ەڭكەيىپ، بەنزين بۋلارىن جۇتىپ قويعان. سونىڭ سالدارىنان ەسىنەن تانىپ، شامامەن 20 مينۋت بويى سيستەرنا ۇستىندە قوزعالىسسىز جاتقان.

ونى باسقا ساربازدار بايقاپ، العاشقى كومەك كورسەتۋگە تىرىسقانىمەن، ساربازدىڭ ءومىرىن ساقتاپ قالۋ مۇمكىن بولماعان.

اتالعان ءىس ق ر قىلمىستىق كودەكسىنىڭ 453-بابى 2-بولىگى "قىزمەتكە سالعىرت قاراۋ، اۋىر سالدارعا اكەپ سوعۋ" دەرەگى بويىنشا تەرگەلدى. ءىستى اقتوبە گارنيزونىنىڭ اسكەري سوتى قارادى.

سوتتالۋشى ءوز كىناسىن تولىق مويىندادى. سونىمەن قاتار، سوت ونى مارقۇمنىڭ اناسىنا مورالدىق زيان رەتىندە 10 ميلليون تەڭگە وتەماقى تولەۋگە مىندەتتەدى.

ۇكىم ءالى زاڭدى كۇشىنە ەنگەن جوق.