ماڭعىستاۋ ءوڭىرىنىڭ وزەكتى ماسەلەلەرىنىڭ ءبىرى – حالىقتى جۇمىسپەن قامتۋ. بۇگىندە ايماق بويىنشا جۇمىسسىزدىق دەڭگەيى – 4،9% قۇرايدى. جىل باسىنان بەرى 11 557 جۇمىس ورنى قۇرىلدى، ونىڭ 6 741 تۇراقتى.
قالعان جۇمىس ورىندارى شاعىن جانە ورتا كاسىپكەرلىك سۋبەكتىلەرىنىڭ ەسەبىنەن قۇرىلدى.
كاسىپكەرلىكتى دامىتۋ جونىندەگى ۇلتتىق جوباسى اياسىندا 10 مىڭنان استام ادام ءارتۇرلى جۇمىسپەن قامتۋدىڭ بەلسەندى شارالارىمەن قامتىلىپ، ونىڭ ىشىندە 5 مىڭنان استام ادام جۇمىسقا ورنالاستىرىلدى.
سونداي-اق، 2021 جىلى «جۇمىس جاسايمىن» وڭىرلىك جوباسى باستالدى. بيىل جەرگىلىكتى بيۋدجەتتەن 955،5 ملن تەڭگە ءبولىنىپ، 646 تۇرعىن تۇراقتى جۇمىس ورىندارىنا ورنالاستىرىلدى.
سونىمەن قاتار، مەملەكەت باسشىسىنىڭ تاپسىرماسىنا سايكەس وسى جىلى «العاشقى جۇمىس ورنى» جوباسى جانە جاستار تاجىريبەسىنىڭ قاتىسۋ ۋاقىتى 12 ايعا، جالاقى مولشەرى 30 اەك دەيىن ۇلعايتىلدى.
بۇعان قوسا، 29 جاسقا دەيىنگى جاستار مەن الەۋمەتتىك وسال توپتاعى ازاماتتاردىڭ بيزنەس-يدەيالارىن ىسكە اسىرۋعا ارنالعان قايتارىمسىز گرانتتاردىڭ كولەمى 200 ايلىق ەسەپتىك كورسەتكىشتەن 400 اەك دەيىن كوبەيتىلدى.
ماڭعىستاۋ وبلىسىنىڭ جۇمىسسىز تۇرعىندارىن جۇمىسقا ورنالاستىرۋ ماقساتىندا قالالار مەن اۋدانداردىڭ جۇمىسپەن قامتۋ ورتالىقتارى رەسەيدىڭ «تاتنەفت» كومپانياسىمەن بىرلەسىپ 1-3 ماۋسىمدا اقتاۋ جانە جاڭاوزەن قالالارىندا اڭگىمەلەسۋ ۇيىمداستىردى. سۇحباتقا 531 ادام قاتىستى، بۇگىنگى تاڭدا 190 تۇرعىن بويىنشا وڭ شەشىم قابىلداندى.
ولاردى كەزەڭ-كەزەڭىمەن جۇمىسقا ورنالاستىرۋ ءۇشىن ءتيىستى شارالار قابىلداناتىن بولادى. جالپى، كومپانيا تاتارستان رەسپۋبليكاسىندا، رەسەي فەدەراسياسىندا جۇمىس ىستەۋ ءۇشىن 600-دەن استام ادامدى قابىلداۋدى جوسپارلاپ وتىر.
