بۇگىن، 12 ناۋرىزدا ماڭعىستاۋ وبلىسىنىڭ اكىمى نۇرداۋلەت قيلىباي ءتۇپقاراعان اۋدانىنىڭ ورتالىعى فورت-شيەۆچەنكو قالاسىندا 100 وتباسىعا ارنالعان تۇرعىن جايدىڭ اشىلۋ راسىمىنە قاتىستى. بۇل پاتەرلەر الەۋمەتتىك جانە بيۋدجەتتىك سالا قىزمەتكەرلەرىنە قولجەتىمدى باسپانا ۇسىنۋ ماقساتىندا سالىنعان، دەپ حابارلايدى Dalanews.kz.
جالپى اۋماعى 2،6 گەكتاردى قۇرايتىن جاڭا نىسان ەكى قاباتتى جاتاقحانادان تۇرادى. مۇندا ءبىر جانە ەكى بولمەلى 100 پاتەر قاراستىرىلعان. ونىڭ 84ء-ى ءبىر بولمەلى، 16-سى ەكى بولمەلى. سونىمەن قاتار، جاتاقحانادا بالالار ويىن الاڭى، سپورت الاڭى جانە اۆتوتۇراق بار.
وبلىس باسشىسى نۇرداۋلەت قيلىباي پاتەر يەلەرىن جاڭا قونىستارىمەن قۇتتىقتاپ، بۇل يگىلىكتى ءىستىڭ جۇزەگە اسۋىنا دەمەۋشىلىك جاساعان كومپانياعا العىسىن ايتتى.
"مەملەكەت باسشىسىنىڭ شەشىمىمەن ەلىمىزدە بيىلعى جىل «جۇمىسشى ماماندىقتار جىلى» دەپ جاريالاندى. بۇل باستاما جۇمىسشى ماماندىقتارىنىڭ ماڭىزدىلىعىن ارتتىرۋعا، جاستاردى وسى سالاعا تارتۋعا، سۇرانىسقا يە ماماندىقتار بويىنشا بىلىكتى كادرلاردى دايارلاۋعا مۇمكىندىك بەرەدى. بۇل جاڭا جاتاقحانادا جاس الەۋمەتتىك جانە بيۋدجەتتىك سالا قىزمەتكەرلەرىنىڭ جايلى ءومىر سۇرۋىنە بارلىق جاعداي جاسالعان. جاڭا قونىستارىڭىز قۇتتى بولسىن! وسى ىسكە مۇرىندىق بولعان ازاماتتارعا العىس بىلدىرەمىز. الداعى ۋاقىتتا اۋداندى دامىتۋعا قاتىستى جۇيەلى جوسپارلار بار. بۇل باعىتتا جۇمىستار جالعاساتىن بولادى"، – دەدى وبلىس اكىمى نۇرداۋلەت قيلىباي.
ايتا كەتەيىك، اتالعان جوبا NCOC كومپانياسىنىڭ قارجىلىق قولداۋىمەن جۇزەگە اسىرىلدى.
