ماڭعىستاۋ وبلىسىنىڭ اكىمى نۇرداۋلەت قيلىبايدىڭ توراعالىعىمەن وتكەن اپپاراتتىق كەڭەستە جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ادايبەك قالييەۆ 2024 جىلى اتقارىلعان جۇمىستاردىڭ قورىتىندىسى مەن الداعى جوسپارلار جونىندە بايانداما جاسادى،- دەپ حابارلايدى Dalanews.kz
ادايبەك قالييەۆتىڭ ايتۋىنشا، وڭىردە «ماڭعىستاۋ» جانە «بەينەۋ» تەمىرجول ۆوكزالىن رەكونسترۋكسيالاۋ جوباسى جۇزەگە اسىرىلماق. جوسپارعا سايكەس، قۇرىلىس-مونتاج جۇمىستارى بيىل باستالادى.
سونىمەن قاتار، «قازاقستان تەمىر جولى» ۇلتتىق كومپانياسىنىڭ 2025-2026 جىلدارعا ارنالعان كەشەندى دامۋ باعدارلاماسىنا «ماڭعىستاۋ-بەينەۋ» جانە «ماڭعىستاۋ-وزەن» تەمىرجول ۋچاسكەلەرىن دامىتۋ بويىنشا ءبىرقاتار ءىس-شارالار ەنگىزىلدى. بۇگىندە وبلىستاعى تەمىرجول جەلىلەرىنىڭ وتكىزۋ قابىلەتى تومەن. اتاپ ايتقاندا، «ماڭعىستاۋ-بەينەۋ» ۋچاسكەسىندە تاۋلىگىنە 12-14 پويىز عانا وتەدى، ال قاجەتتىلىك 20-22 پويىزدى قۇرايدى.
كەشەندى جوسپار اياسىندا وبلىستىڭ تەمىرجول ينفراقۇرىلىمىن جاڭعىرتۋ جۇمىستارى 2026 جىلدىڭ سوڭىنا دەيىن اياقتالادى.
سونداي-اق، بىلتىر جەرگىلىكتى ماڭىزداعى 2 اۆتو جول قايتا جاڭعىرتىلىپ، 4 جولعا ورتاشا جوندەۋ جۇمىستارى جۇرگىزىلدى.
وبلىس اكىمى نۇرداۋلەت قيلىباي باسقارما باسشىسى ادايبەك قالييەۆكە قۇرىلىس مەرزىمى ۇزاققا سوزىلعان ءبىرقاتار جولدى تەزىرەك اياقتاپ، تۇرعىنداردىڭ يگىلىگىنە بەرۋدى تاپسىردى.
اتاپ ايتقاندا، اۋداندىق ماڭىزداعى «شەتپە-قىزان» اۆتوجولىنىڭ 49-85 شاقىرىم جانە 85-110 شاقىرىم ۋچاسكەسىنىڭ رەكونسترۋكسياسى، «جىڭعىلدى – شايىر – شەرقالا مەكەنى» اۆتوموبيل جولىن رەكونسترۋكسيالاۋ جانە اقتاۋ قالاسىنداعى «شىعىس-2، 3» شاعىناۋداندارىنداعى اۆتوموبيل جولىن سالۋ جوبالارى.
ادايبەك قالييەۆ اتالعان جوبالاردى جىل سوڭىنا دەيىن اياقتاۋعا جۇمىستاناتىنىن مالىمدەدى.
