ماڭعىستاۋ وبلىسىنىڭ جاڭادان تاعايىندالعان اكىمى نۇرداۋلەت قيلىباي باسشىلىق قىزمەتكە تاعايىندالۋىنا قاتىستى پىكىر ءبىلدىردى، - دەپ حابارلايدى Dalanews.kz.  

نۇرداۋلەت قيلىبايدىڭ سوزىنشە، ول تاعايىندالعاننان كەيىن ءۇش كۇننەن سوڭ "پرەزيدەنتتىڭ قابىلداۋىندا بولاسىز" دەگەن حابار كەلگەن.

"مەن ءۇشىن كۇتپەگەن جاعداي، بۇرىن-سوڭدى پرەزيدەنتپەن كوزبە-كوز وتىرىپ سويلەسىپ كورمەگەن، قابىلداۋىندا بولماعان اداممىن. پرەزيدەنتتىڭ قابىلداۋىندا بولدىم. ارينە، قاسىم-جومارت كەمەل ۇلىنىڭ بەرەتىن تاپسىرمالارىنىڭ بارلىعى - وسى ەلدىڭ وسۋى-وركەندەۋى، تۇرمىستىق جاعدايىنىڭ جاقسارۋى. ءار سالانى قوزعادى: مەديسينا دا بار، ءبىلىم دە بار. ماڭعىستاۋدا ءبىلىم كورسەتكىشى جاقسى بولىپ تۇرعان جوق. ينۆەستيسيا تارتۋ، ءتۋريزمدى دامىتۋ دەگەن سياقتى ءارتۇرلى باعىتتا تاپسىرما بەردى. مەن ول كىسىگە قوشتاساردىڭ الدىندا "قاسىم-جومارت كەمەل ۇلى، رۇقسات پا، ىشىمدە كەتىپ قالماسىن، كوكەيىمدە تۇرعان ءبىر سۇراق بار" دەدىم. "ايتىڭىز" دەدى.

اشىعىن ايتتىم. "بۇرىن-سوڭدى جوعارى لاۋازىمعا قولى ۇزىنداۋ، تانىسى بار كىسىلەر بولاتىن ەدى. جاڭاوزەن دەگەن جەردە جۇرگەن قازاقتىڭ قاراپايىم جىگىتى ەدىم، ءبىر كۇننىڭ ىشىندە قالاي بولىپ كەتكەنىن تۇسىنبەي قالدىم" دەدىم. ول كىسى "سىرتىڭىزدان زەرتتەدىك، ءسىزدى ءبىر كۇننىڭ ىشىندە تاعايىنداپ تاستاۋ نەمەسە قولى ۇزىن كىسىلەر تۋرالى سۇراعىڭىزعا قىسقاشا جاۋابىم: بۇل باسقا قازاقستان" دەدى. مەن بۇل سۇراقتى پرەزيدەنتكە قويدىم. ەكى اۋىز سوزبەن "باسقا قازاقستان" دەپ جاۋاپ بەردى"، - دەيدى نۇرداۋلەت قيلىباي Massaget.kz تىلشىسىنە بەرگەن سۇحباتىندا.