"بارلىعىمىز بىلەتىندەي، جەر قاتىناستارى سالاسىندا شىققان ماسەلەلەرگە بايلانىستى پرەزيدەنتتىڭ 2016 جىلدىڭ 6 مامىرىنداعى جارلىعى بويىنشا جەر كودەكسىنىڭ كەيبىر نورمالارىنا موراتوريي ەنگىزىلگەن بولاتىن. ناقتىلاپ ايتقاندا، بۇل ق ر 2015 جىلدىڭ 2 قاراشاسىنداعى "ق ر جەر كودەكسىنە وزگەرىستەر مەن تولىقتىرۋلار ەنگىزۋ تۋرالى" زاڭىنىڭ نورمالارىن جۇزەگە اسىرۋ؛ ەكىنشىسى، شەتەلدىكتەرگە ۇسىنۋ، ازاماتتىعى جوقتارعا، شەتەلدىك زاڭدى تۇلعالارعا، سونىمەن قاتار جارعىلىق كاپيتالىندا 50 پايىزدان اسا ۇلەسى شەتەلدىكتەردىڭ مەنشىگىندەگى زاڭدى تۇلعالارعا، اۋىل شارۋاشىلىق جەر ۋچاسكەلەرىن جالعا الۋ شارتىمەن ۇسىنۋعا. ءۇشىنشى نورما مەملەكەتتىڭ مەنشىگىندەگى اۋىلشارۋاشىلىعىنداعى جەر ۋچاسكەلەرىن جەكە مەنشىك قۇقىعىنا بەرۋ"، – دەپ حابارلادى ۆيسە-پرەمەر – اۋىل شارۋاشىلىعىنىڭ ءمينيسترى اسقار مىرزاحمەتوۆ.
ول وسى نورماعا بايلانىستى ۇكىمەتكە سايكەس تاپسىرما بەرىلگەنىن اتاپ ءوتتى. "سىزدەرگە قاراستىرۋعا ۇسىنىلعان زاڭ جوباسى وسى تاپسىرمانى جۇزەگە اسىرۋ ءۇشىن جاسالعان"، – دەدى مينيستر.
زاڭ جوباسى ەكى وقىلىمدا قابىلداندى.
ءماجىلىس دەپۋتاتى سەرگەي زۆولسكييدىڭ ايتۋىنشا، زاڭ جوباسىن تالقىلاۋ بارىسىندا دەپۋتاتتار تاراپىنان جەر قاتىناستارىن رەتتەۋگە باعىتتالعان باسقا دا ءبىرقاتار ۇسىنىستار كەلىپ تۇسكەن. سونىڭ ىشىندە اۋىل شارۋاشىلىعى ماقساتىنداعى جەرلەردى پايدالانۋ ماسەلەلەرى دە بار. الايدا، ونى باستاما جاساعان دەپۋتاتتار كەيىننەن وزدەرى الىپ تاستادى. «ءبىز جەر زاڭناماسىنا قاتىستى زاڭنامالىق وزگەرىستەر ەنگىزۋ ماسەلەسىنى تەك ق ر پرەزيدەنتىنىڭ تاپسىرماسى بويىنشا قۇرىلعان جەر رەفورماسى جونىندەگى رەسپۋبليكالىق كوميسسيانىڭ وتىرىستارى اياقتالعاننان كەيىن عانا قاراستىرامىز دەپ شەشتىك. كوميسسيا جەرگىلىكتى جۇرتشىلىقتىڭ پىكىرلەرىن، وڭىرلەردەگى ماسەلەلەردى تەرەڭ قاراستىرىپ، تالقىلاۋعا كىرىسكەن. وسىعان بايلانىستى، قارالىپ وتىرعان زاڭ جوباسىندا مەملەكەت باسشىسىنىڭ مامىر ايىنداعى موراتوريي تۋرالى جارلىعىن ىسكە اسىرۋ تەتىكتەرى عانا قامتىلىپ وتىر»، – دەدى س.زۆولسكيي.
Abai.kz
