Májilis jerdi satý men jalǵa beretin zańdy toqtatty
"Barlyǵymyz biletindei, jer qatynastary salasynda shyqqan máselelerge bailanysty Prezidenttiń 2016 jyldyń 6 mamyryndaǵy jarlyǵy boiynsha jer kodeksiniń keibir normalaryna moratorii engizilgen bolatyn. Naqtylap aitqanda, bul QR 2015 jyldyń 2 qarashasyndaǵy "QR Jer kodeksine ózgerister men tolyqtyrýlar engizý týraly" zańynyń normalaryn júzege asyrý; Ekinshisi, sheteldikterge usyný, azamattyǵy joqtarǵa, sheteldik zańdy tulǵalarǵa, sonymen qatar jarǵylyq kapitalynda 50 paiyzdan asa úlesi sheteldikterdiń menshigindegi zańdy tulǵalarǵa, aýyl sharýashylyq jer ýchaskelerin jalǵa alý shartymen usynýǵa. Úshinshi norma memlekettiń menshigindegi aýylsharýashylyǵyndaǵy jer ýchaskelerin jeke menshik quqyǵyna berý", – dep habarlady vitse-premer – aýyl sharýashylyǵynyń ministri Asqar Myrzahmetov.
Ol osy normaǵa bailanysty Úkimetke sáikes tapsyrma berilgenin atap ótti. "Sizderge qarastyrýǵa usynylǵan zań jobasy osy tapsyrmany júzege asyrý úshin jasalǵan", – dedi ministr.
Zań jobasy eki oqylymda qabyldandy.
Májilis depýtaty Sergei Zvolskiidiń aitýynsha, zań jobasyn talqylaý barysynda depýtattar tarapynan jer qatynastaryn retteýge baǵyttalǵan basqa da birqatar usynystar kelip túsken. Sonyń ishinde aýyl sharýashylyǵy maqsatyndaǵy jerlerdi paidalaný máseleleri de bar. Alaida, ony bastama jasaǵan depýtattar keiinnen ózderi alyp tastady. «Biz jer zańnamasyna qatysty zańnamalyq ózgerister engizý máselesini tek QR Prezidentiniń tapsyrmasy boiynsha qurylǵan Jer reformasy jónindegi respýblikalyq komissiianyń otyrystary aiaqtalǵannan keiin ǵana qarastyramyz dep sheshtik. Komissiia jergilikti jurtshylyqtyń pikirlerin, óńirlerdegi máselelerdi tereń qarastyryp, talqylaýǵa kirisken. Osyǵan bailanysty, qaralyp otyrǵan zań jobasynda Memleket basshysynyń mamyr aiyndaǵy moratorii týraly Jarlyǵyn iske asyrý tetikteri ǵana qamtylyp otyr», – dedi S.Zvolskii.
Abai.kz
