بۇعان دەيىن سەناتورلار «تۇڭعىش پرەزيدەنت – ەلباسى» تۋرالى كونستيتۋسيالىق زاڭعا وزگەرىستەردى قابىلدادى. وعان سايكەس، ەلباسىنىڭ قاۋىپسىزدىك كەڭەسىنە جانە قازاقستان حالقى اسسامبلەياسىنا ءومىر بويى ءتوراعالىق ەتۋ قۇزىرەتى توقتاتىلدى.
الايدا زاڭ جوباسىن قاراۋ بارىسىندا سەنات ەلباسىمەن مەملەكەتتىك باستامالاردى كەلىسۋ قاجەتتىلىگىن الىپ تاستاۋدى ۇسىنىپ، كونستيتۋسيالىق زاڭ جوباسىن ماجىلىسكە قايتاردى.
بۇگىن، 2 اقپاندا وتكەن ءماجىلىس وتىرىسىندا دەپۋتاتتار سەنات ەنگىزگەن وزگەرىستى ماقۇلدادى.
– زاڭ جوباسىن پارلامەنت سەناتىندا قاراۋ بارىسىندا قوسىمشا تۇزەتۋ ەنگىزىلدى. اتاپ ايتقاندا، سەنات مەملەكەتتىڭ ىشكى جانە سىرتقى ساياساتىنىڭ نەگىزگى باعىتتارى بويىنشا ازىرلەنەتىن باستامالار قازاقستاننىڭ تۇڭعىش پرەزيدەنتى – ەلباسىمەن كەلىسۋدى كوزدەيتىن باپتى الىپ تاستاۋدى ۇسىندى. سەبەبى كونستيتۋسياعا سايكەس، رەسپۋبليكا پرەزيدەنتى مەملەكەتتىڭ ىشكى جانە سىرتقى ساياساتىنىڭ نەگىزگى باعىتتارىن ايقىندايدى. سونداي-اق ەل ىشىندە جانە حالىقارالىق قاتىناستاردا قازاقستان اتىنان وكىلدىك ەتەدى. قورىتا ايتقاندا، پارلامەنت ەنگىزگەن وزگەرىسپەن كەلىسۋدى ۇسىنامىز، – دەدى ماجىلىسمەن، زاڭناما جانە سوت-قۇقىقتىق رەفورما كوميتەتىنىڭ ءتوراعاسى ارمان قوجاحمەتوۆ.
ءماجىلىس دەپۋتاتتارى بۇل ۇسىنىستى ءبىراۋىزدان قولدادى. پارلامەنت قابىلداعان كونستيتۋسيالىق زاڭ مەملەكەت باسشىسىنىڭ قول قويۋىنا جىبەرىلدى.
قحا مەن قاۋىپسىزدىك كەڭەسى ءتوراعاسىنىڭ وكىلەتتىكتەرى قازاقستان پرەزيدەنتىنە بەرىلدى.
