سوڭعى ۋاقىتتارى ديزەل وتنىنىڭ تاپشىلىعى جۇرتتى ابىگەرگە سالعانى جاسىرىن ەمەس. جالپى جيىن-تەرىن كەزىندە جاعارماي تاپشىلىعىنىڭ تۋىنداۋى ۇيرەنشىكتى جاعادايعا اينالعانداي... وسى ماسەلەگە قاتىستى ق ر ەنەرگەتيكا ۆيسە-مينيسترى اسەت ماعاۋوۆ ديزەل وتىنىنىڭ تاپشىلىعىنىڭ ورىن الۋىنا قانداي جايتتار اسەر ەتكەنىن جىپكە تىزگەندەي ايتىپ بەردى.  

ءبىرىنشى كەزەكتە ۆيسە-مينيستر اسەت مارات ۇلى ەلىمىزدە ديزەل وتىنىن تۇتىنۋ كولەمى وتكەن جىلمەن سالىستىرعاندا ايتارلىقتاي وسكەنىن اتاپ ءوتتى. ونىڭ ايتۋىنشا، بيىلعى جازدا حالىق وتكەن جىلمەن سالىستىرعاندا 480 مىڭ توننادان استام ديزەل وتىنىن ارتىق پايدالانعان. وتكەن جىلى كارانتيندىك شارالاردان كەيىن شارۋالار ديزەل وتىنى از مولشەردە تۇتىنۋى مۇمكىن. ءبىراق ونى اسەت ماعاۋوۆ ەسەپكە الماعان سىڭايلى.

جالپى بيىل اۋىل شارۋاشىلىعى سالاسىندا ورىن العان قۋاڭشىلىقتى ەسكەرسەك، ديزەل وتىنىنا دەگەن سۇرانىستىڭ ءبىرشاما ارتۋىن بايقاۋعا بولار ەدى. بيىل شارۋالار شابىندىقتان بولەك ساي-سالاداعى قامىس-قۇراقتاردى قۋالاي شاۋىپ، قىسقا مال ازىعىن دايىنداۋعا كۇش سالدى. ولار مۇنداي جاعدايدا مولشەردەن تىس ديزەل وتىنىن تۇتىناتىنى ايتپاسا دا تۇسىنىكتى. مۇنى ق ر ەنەرگەتيكا مينيسترلىگى كۇنى-بۇرىن بولجاپ، قام جاساۋى كەرەك ەدى. وكىنىشكە وراي، مينيسترلىك وكىلدەرى اۋىل شارۋاشىلىعىنداعى جاعدايعا باس اۋىرتپاعان سىڭايلى.

اسەت ماعاۋوۆ ەلىمىزدە ديزەل وتىنىنىڭ تاپشىلىعىنىڭ تاعى ءبىر باستى سەبەى رەتىندە اتىراۋ مۇناي وڭدەۋ زاۋىتىنىڭ جوسپاردان تىس جۇمىسىن توقتاتۋى اسەر ەتكەنىن دە العا تارتتى. وسىلايشا ويلاماعان جەردەن جۇمىسىن توقتاتقان مۇناي وڭدەۋ زاۋىتىنىڭ كەسىرىنەن ىشكى نارىققا قاجەتتى 230 مىڭ توننا كولەمىندەگى ديزەل وتىنى وندىرىلمەي قالعان. بۇل دا ەلىمىزدە ديزەل وتىنىنا دەگەن تاپشىلىقتى ۋشىقتىرسا كەرەك.

سونىمەن قاتار جىلدا سىرت ەلدەردەن جەتكىزىلەتىن ديزەل وتىنىنىڭ ءتيىستى مولشەردە كەلمەۋى دە وتقا ماي قۇيعانداي بولىپتى... ەستەرىڭىزگە سالامىز، وتكەن جىلى ەلىمىزگە كورشىلەس رەسەيدەن 500 مىڭ توننا كولەمىندە ديزەل وتىنى ەكسپورتتالسا، بيىل ونىڭ مولشەرى بار بولعانى 26 مىڭ توننا قۇراپتى. وسىلايشا اسەت مارات ۇلى ديزەل وتىنىنا دەگەن تاپشىلىقتىڭ تۋىنداۋىنا قاتىستى باستى سەبەپتەرىن اتاپ بەردى.

جانار-جاعارمايدىڭ تاپشىلىعى ورىن العاندا كوپشىلىك قاۋىم وسى سالاعا جاۋاپتى مەكەمەلەر «نەگە تاپشىلىقتىڭ الدىن المادى» دەگەن سىن-ەسكەرتپەلەر ايتا باستايتىنى بەلگىلى. ءبىراق بۇل جولى ق ر ەنەرگەتيكا مينيسترلىگى ەرتە كوكتەمدە ديزەل وتىنىنىڭ قورى تومەندەگەندە كولىك قۇرالدارىمەن جانە تەمىر جولمەن كورشىلەس ەلدەرگە ديزەل وتىنىن ەكسپورتتاۋعا شەكتەۋ قويىپتى. ءبىراق بۇل شەكتەۋلەردىڭ ديزەل وتىنىن تاسىمالداۋشىلار قانشالىقتى ورىنداعانىن ۆيسە-مينيستر اشىپ ايتقان جوق. بۇدان باسقا مينيسترلىك اتىراۋ مەن شىمكەنت مۇناي وڭدەۋ زاۋىتتارىنا جوسپاردان تىس 100 مىڭ توننا ديزەل وتىنىن ءوندىرۋ تۋراسىندا جاڭا مىندەت جۇكتەپتى. ايتەۋىر ق ر ەنەرگەتيكا مينيسترلىگى قاراپ قالماپتى. وسى قابىلداعان شارالار ەلىمىزدە ديزەل وتىنى تاپشىلىعىن جويۋ ءۇشىن ءبىرشاما ۋاقىت كەرەك. ەندى سونى كۇتۋدەن باسقا امال جوق.