29 ساۋىردە قازاقستان پرەزيدەنتى قاسىم-جومارت توقايەۆ پەن بەلارۋس پرەزيدەنتى الەكساندر لۋكاشەنكو تەلەفون ارقىلى سويلەستى، دەپ حابارلايدى Dala News.
اڭگىمە بارىسىندا مەملەكەت باسشىلارى قازاقستان مەن بەلارۋس اراسىنداعى ىنتىماقتاستىقتىڭ دامۋىن تالقىلاپ، سوڭعى ۋاقىتتا ەكىجاقتى بايلانىستاردىڭ جوعارى دەڭگەيدە ەكەنىن اتاپ ءوتتى. سوڭعى جارتى جىل ىشىندە ءبىرقاتار ماڭىزدى ساپارلار جۇزەگە اسقان. اتاپ ايتقاندا، قازاقستانعا بەلارۋستىڭ پرەمەر-مينيسترى مەن سىرتقى ىستەر ءمينيسترى كەلگەن، ال مينسكىدە قازاقستان ءماجىلىسىنىڭ ءتوراعاسى بولعان.
پرەزيدەنتتەر الداعى كەزدەسۋلەر مەن ءىس-شارالار كەستەسىن دە تالقىلادى. مامىر ايىنىڭ سوڭىندا استانادا جوعارى ەۋرازيالىق ەكونوميكالىق كەڭەس پەن ەۋرازيالىق ەكونوميكالىق فورۋم وتەدى. كەزدەسۋ بارىسىندا وسى حالىقارالىق الاڭداردىڭ كۇن تارتىبىنە كىرەتىن نەگىزگى ماسەلەلەر قارالدى.
سونىمەن قاتار، جەڭىس كۇنى قارساڭىندا ەكى ەل باسشىلارى ءبىر-بىرىن قۇتتىقتاپ، قازاقستان مەن بەلارۋس حالىقتارىنا بەيبىتشىلىك پەن اماندىق تىلەدى.
الەكساندر لۋكاشەنكو قازاقستان پرەزيدەنتىن بەلارۋسكە رەسمي ساپارمەن كەلۋگە قايتا شاقىردى. بۇل ساپار بارىسىندا ەكىجاقتى ىنتىماقتاستىقتى جان-جاقتى تالقىلاپ، بولاشاق جوبالار مەن جوسپارلاردى ايقىنداۋ كوزدەلىپ وتىر.
سونداي-اق كۇزدە مينسكىدە وتەتىن ەۋرازيالىق ۇكىمەتارالىق كەڭەس پەن «يننوپروم» حالىقارالىق كورمەسىنە قازاقستان پرەمەر-مينيسترى باستاعان دەلەگاسيانىڭ قاتىسۋى كۇتىلۋدە.
