اۋىلىمىز قالادان شالعاي بولعاندىقتان، ينتەرنەت جەلىسى دۇرىس جولعا قويىلماعان. اۋىل تۇرعىندارىنىڭ ەرمەگى – تەلەديدار. كوك جاشىكتە كوپشىلىككە ارنالعان باعدارلاما كوپ-اق. اتاۋى باسقا، ايتارى ءبىر. وتباسىممەن وتىرىپ مەن دە ءبىراز حاباردى كورەمىن. باعدارلامادان بولەك، شەتەلدىڭ كينو-سەريالدارى دا كوپ. بايقاعانىم، «Hit Qazaqstan»، «قىزىق ەكەن»، «ماسەلەنىڭ» قالىپتاسقان كورەرمەنى بار.
«حابار» ارناسىنىڭ «تىكەلەي ەفيرىن» ءلايلا سۇلتان قىزى جۇرگىزەدى. جۇرگىزۋشىنىڭ كاسىبي شەبەرلىگىنە داۋىمىز جوق. ءبىراق، تىكەلەي ەفيردەگى سويلەۋ ەتيكاسى كوڭىلگە قونا بەرمەيدى. «ەركەنىڭ ەركەلىگىن كىم كوتەرەدى؟» دەگەن كەزەكتى شىعارىلىمىن كوردىك. بەلگىلى ءانشىنى شاقىرىپ، ءتۇرلى سۇراق قويدى. دەگەنمەن، «جۇرگەن جەرى شۋعا اينالاتىن ەركە قىزدارىڭىز» دەپ تانىستىرۋى وعاش كورىندى. «جۇرگەن جەرى شوۋ» دەسە بىلىنبەي كەتەتىن ەدى. قازاقتا جۇرگەن جەرىنە ءشوپ شىقپاعان، ارتىنان داۋى ۇزىلمەگەن ادامدى «اتىشۋلى» دەمەۋشى مە ەدى؟ ودان كەيىن كەيىپكەر جايلى بەينەسيۋجەت كورسەتىلدى. «اجىراسقان ەركە…»، «ەركەنىڭ ەكىنشى كۇيەۋى كىم؟»، «جىگىتتەرگە جابىسقان ەركە» سىندى دورەكى سوزدەرى قۇلاققا تۇرپىدەي ءتيدى.
تىكەلەي ەفير بارىسىندا، اسىرەسە، شوۋ بولعان سوڭ، ءارتۇرلى جاعدايلار ءجيى كەزدەسەدى. مۇندايدان ادەمى شىعۋدىڭ جولىن بىلەتىن ءلايلا حانىمنىڭ شەبەرلىگىنە ءتانتى بولاسىڭ. ءبىراق، تىكەلەي ەفيردە تىم ەركىنسىپ، قۇلاققا تۇرپىدەي تيەتىن سوزدەردى قولدانباسا يگى ەدى.
دەرەككوزى: stan.kz
https://dalanews.kz/24503
