اقتوبەدە 5 ماۋسىمداعى لاڭكەستىك وقيعانىڭ زاردابىمەن كۇرەس جۇمىستارى ءالى ءجۇرىپ جاتىر. بۇگىن اقتوبە گارنيزونىنىڭ اسكەري سوتىندا اسكەري ءبولىم مايورلارى قايىرعالي ورازجانوۆ پەن قايناربەك تاستانبەكوۆكە قاتىستى سوت وتىرىسى باستالدى. ولارعا قىلمىستىق كودەكستىڭ «Iشكi قىزمەت اتقارۋدىڭ نەمەسە گارنيزوندا پاترۋل بولۋدىڭ جارعىلىق قاعيدالارىن بۇزۋ» بابى بويىنشا ايىپ تاعىلىپ وتىر. مەملەكەتتىك ايىپتاۋشى تۇراش باكىروۆتىڭ ايتۋىنشا، №6655 اسكەري ءبولىمىنىڭ ەكى قىزمەتكەرى لاڭكەستەر شابۋىل جاساعان كەزدە قاشىپ، اجەتحاناعا تىعىلعان. باس ساۋعالاعان ەكەۋ كەيىن اجەتحانا ىشىندەگى تەرەزە ارقىلى شىعىپ، بەلگىسىز جاققا بەت العان. سوتتالۋشى قايناربەك تاستانبەكوۆ بۇل ۋاجبەن كەلىسپەيدى.
«وقيعا بولعان كۇنى مەن كەزەكشى ءبولىمنىڭ جانىندا بولدىم. سيگنال بەرىلگەن سوڭ 3 سەكۋندتىڭ ىشىندە كەزەكشى ءبولىم ىشىنە كىرىپ، جان-جاققا حابار جىبەردىم. سول كەزدە قاراۋىلدى كوتەرىپ، 102-گە تەلەفون شالدىم. ارنايى جاساقتى شاقىرىپ، ۇلتتىق ۇلاننىڭ “باتىس” ايماقتىق قولباسشىلىعىنا حابار بەرىلدى. ءبىر قاراعاندا، قاراۋىلعا حابار بەرگەن سوڭ ولار لاڭكەستەر شابۋىل جاساپ، قولدى قىلماق بولعان قارۋ-جاراق قويماسىندا كۇزەت كۇشەيتىلدى. لاڭكەستەر قارۋعا قول جەتكىزە المادى. ال مەنى ايىپتاپ وتىر. ءبارى تۇسىنىكسىز، ايىپتاۋلارعا كەلىسپەيمىن»،- دەدى ايىپتالۋشى قايناربەك تاستانبەكوۆ.
ءىس ماتەريالدارىنا سۇيەنسەك، تاستانبەكوۆ لاڭكەستەر شابۋىل جاساعان كۇنى بولىمدە كەزەكشى، ال ورازجانوۆ ونىڭ كومەكشىسى بولعان. شتابقا حابار بەرۋ – ولاردىڭ تىكەلەي مىندەتى. ءبىراق، ولار بۇل قىزمەتىن ۇمىتىپ، قاشا جونەلگەن. مەملەكەتتىك ايىپتاۋشىنىڭ ايتۋىنشا، قارا باستىڭ قامىن ويلاعان اسكەري قىزمەتكەرلەردىڭ ىسىنەن قاتارداعى جاۋىنگەر ساپار دوسبول، مايور دانيەل مايلىبايەۆ وققا ۇشقان.
ءىس 14 تومنان تۇرادى. بۇگىن العاشقى كۋاگەرلەردەن جاۋاپ الىندى. ەكى مايوردى ەكى ادۆوكات قورعاپ جاتىر. ولار ەشقايدا كەتپەۋ تۋرالى قولحاتپەن بوستاندىقتا ءجۇر. ەگەر تاعىلعان ايىپ دالەلدەنسە، قوس مايور 5 جىلعا دەيىن باس بوستاندىقتارىنان ايىرىلۋى مۇمكىن.
