Lańkesterden qorqyp «dárethanaǵa tyǵylǵan» qos maior sot aldynda jaýap berýde
Aqtóbede 5 maýsymdaǵy lańkestik oqiǵanyń zardabymen kúres jumystary áli júrip jatyr. Búgin Aqtóbe garnizonynyń áskeri sotynda áskeri bólim maiorlary Qaiyrǵali Orazjanov pen Qainarbek Tastanbekovke qatysty sot otyrysy bastaldy. Olarǵa Qylmystyq kodekstiń «Ishki qyzmet atqarýdyń nemese garnizonda patrýl bolýdyń jarǵylyq qaǵidalaryn buzý» baby boiynsha aiyp taǵylyp otyr. Memlekettik aiyptaýshy Turash Bákirovtyń aitýynsha, №6655 áskeri bóliminiń eki qyzmetkeri lańkester shabýyl jasaǵan kezde qashyp, ájethanaǵa tyǵylǵan. Bas saýǵalaǵan ekeý keiin ájethana ishindegi tereze arqyly shyǵyp, belgisiz jaqqa bet alǵan. Sottalýshy Qainarbek Tastanbekov bul ýájben kelispeidi.
«Oqiǵa bolǵan kúni men kezekshi bólimniń janynda boldym. Signal berilgen soń 3 sekýndtyń ishinde kezekshi bólim ishine kirip, jan-jaqqa habar jiberdim. Sol kezde qaraýyldy kóterip, 102-ge telefon shaldym. Arnaiy jasaqty shaqyryp, Ulttyq ulannyń “Batys” aimaqtyq qolbasshylyǵyna habar berildi. Bir qaraǵanda, qaraýylǵa habar bergen soń olar lańkester shabýyl jasap, qoldy qylmaq bolǵan qarý-jaraq qoimasynda kúzet kúsheitildi. Lańkester qarýǵa qol jetkize almady. Al meni aiyptap otyr. Bári túsiniksiz, aiyptaýlarǵa kelispeimin»,- dedi aiyptalýshy Qainarbek Tastanbekov.
Is materialdaryna súiensek, Tastanbekov lańkester shabýyl jasaǵan kúni bólimde kezekshi, al Orazjanov onyń kómekshisi bolǵan. Shtabqa habar berý – olardyń tikelei mindeti. Biraq, olar bul qyzmetin umytyp, qasha jónelgen. Memlekettik aiyptaýshynyń aitýynsha, qara bastyń qamyn oilaǵan áskeri qyzmetkerlerdiń isinen qatardaǵy jaýynger Sapar Dosbol, maior Daniel Mailybaev oqqa ushqan.
Is 14 tomnan turady. Búgin alǵashqy kýágerlerden jaýap alyndy. Eki maiordy eki advokat qorǵap jatyr. Olar eshqaida ketpeý týraly qolhatpen bostandyqta júr. Eger taǵylǵan aiyp dáleldense, qos maior 5 jylǵa deiin bas bostandyqtarynan aiyrylýy múmkin.
