ۇلتتىق كينونى قولداۋ ورتالىعى مەملەكەتتىك قولداۋعا ۇمىتكەر كينوجوبالاردى ىرىكتەۋدىڭ ءبىرىنشى كەزەڭىنە سەنارييلەر مەن سەناريي جوسپارلارىن قابىلداۋدىڭ اياقتالعانىن مالىمدەدى، دەپ حابارلايدى Dalanews.kz.
ەلەكتروندى تۇردە تىركەلگەن سەنارييلەر مەن سەناريي جوسپارلارىنىڭ جالپى سانى – 465.
"2024 جىلى انيماسيالىق، دەرەكتى جانە ويىن فيلمدەرىنىڭ ءارتۇرلى ساناتى بويىنشا ءبىرشاما ءوتىنىم كەلىپ ءتۇستى. انيماسيا سالاسىندا 44 ءوتىنىم بەرىلگەن، ونىڭ 37ء-سى ساراپتامالىق كەڭەستىڭ قاراۋىنا جىبەرىلدى، ال 7-ەۋى قابىلدانبادى. دەرەكتى فيلمدەر ساناتىندا 70 ءوتىنىم بەرىلدى، ونىڭ 57ء-سى ساراپتاما كەڭەسىنە جىبەرىلدى، ال 13ء-ى قابىلدانبادى. ويىن فيلمدەرىنە كەلەتىن بولساق، 351 ءوتىنىم ءتۇستى، ونىڭ 277ء-سى ساراپتاما كەڭەسىنىڭ قاراۋىنا بەرىلدى، ال 74ء-ى قابىلدانبادى.
وتىنىمدەردىڭ قابىلدانباۋ سەبەپتەرى: وتىنىمدەردىڭ ءبىر جوبا بويىنشا ءبىر كومپانيادان قايتا بەرىلۋى، سەنارييلەر مەن سەناريي جوسپارىنىڭ بولماۋى، كومپانيادان كونكۋرستىڭ ءبىر باعىتىنا ەكەۋدەن ارتىق ءوتىنىم ءتۇسۋى. قالعان وتىنىمدەر ساراپتاما كەڭەسىنىڭ قاراۋىنا جولداندى"، – دەپ مالىمدەيدى ورتالىقتىڭ باسپا ءسوز قىزمەتى.
كونكۋرسقا قاتىسۋ ءۇشىن قۇجاتتاردى قابىلداۋ 12-18 ءساۋىر ارالىعىندا جۇرگىزىلدى. اتاپ ءوتۋ كەرەك، 10 ساۋىردە الماتىدا كينويندۋستريا وكىلدەرىمەن كەزدەسۋ ۇيىمداستىرىلدى، سونىمەن قاتار 8-18 ءساۋىر ارالىعىندا ءۇش باعىت بويىنشا كونسۋلتاسيالىق قولداۋ شارالارى جۇرگىزىلدى. استانا جانە الماتى قالالارىنداعى ورتالىق كەڭسەسىندە جەكە كونسۋلتاسيالار، تەلەفون قوڭىراۋلارى ارقىلى سۇراقتارعا جاۋاپ بەرىلدى، الەۋمەتتىك جەلىدە جاڭا ەرەجەگە، كونكۋرسقا قاتىستى قاجەتتى مالىمەتتەر جاريالاندى.
