Ulttyq kınony qoldaý ortalyǵy memlekettik qoldaýǵa úmitker kınojobalardy irikteýdiń birinshi kezeńine senarıler men senarı josparlaryn qabyldaýdyń aıaqtalǵanyn málimdedi, dep habarlaıdy Dalanews.kz.

Elektrondy túrde tirkelgen senarıler men senarı josparlarynyń jalpy sany – 465.

"2024 jyly anımasıalyq, derekti jáne oıyn fılmderiniń ártúrli sanaty boıynsha birshama ótinim kelip tústi. Anımasıa salasynda 44 ótinim berilgen, onyń 37-si saraptamalyq keńestiń qaraýyna jiberildi, al 7-eýi qabyldanbady. Derekti fılmder sanatynda 70 ótinim berildi, onyń 57-si saraptama keńesine jiberildi, al 13-i qabyldanbady. Oıyn fılmderine keletin bolsaq, 351 ótinim tústi, onyń 277-si saraptama keńesiniń qaraýyna berildi, al 74-i qabyldanbady.

Ótinimderdiń qabyldanbaý sebepteri: ótinimderdiń bir joba boıynsha bir kompanıadan qaıta berilýi, senarıler men senarı josparynyń bolmaýy, kompanıadan konkýrstyń bir baǵytyna ekeýden artyq ótinim túsýi. Qalǵan ótinimder saraptama keńesiniń qaraýyna joldandy", – dep málimdeıdi ortalyqtyń baspasóz qyzmeti.

Konkýrsqa qatysý úshin qujattardy qabyldaý 12-18 sáýir aralyǵynda júrgizildi. Atap ótý kerek, 10 sáýirde Almatyda kınoındýstrıa ókilderimen kezdesý uıymdastyryldy, sonymen qatar 8-18 sáýir aralyǵynda úsh baǵyt boıynsha konsýltasıalyq qoldaý sharalary júrgizildi. Astana jáne Almaty qalalaryndaǵy ortalyq keńsesinde jeke konsýltasıalar, telefon qońyraýlary arqyly suraqtarǵa jaýap berildi, áleýmettik jelide jańa erejege, konkýrsqa qatysty qajetti málimetter jarıalandy.