دەنساۋلىق ساقتاۋ باسقارماسى مەن سانيتارلىق-ەپيدەميولوگيالىق قىزمەت وكىلدەرىنىڭ قاتىسۋىمەن وتكەن بريفينگتە جۋرناليستەر "الماتىلىقتاردى نەگە Halyk Arena-عا ورنالاستىرادى جانە بۇل قالاداعى اۋرۋحانالاردا ورىن جەتىسپەيتىندىگىن بىلدىرە مە" دەگەن سۇراق قويدى.
دەنساۋلىق ساقتاۋ باسقارماسىنىڭ وكىلى سۆەتلانا سۇلتانعازييەۆا قازىرگى كەزدە جۇقپالى اۋرۋلار اۋرۋحانالارىندا (5 000 توسەك) 2 783 ادام جاتقانىن، ونىڭ 109-ى بالالار ەكەنىن جەتكىزدى. جانساقتاۋ بولىمىندە 125 ادام جاتىر (295 توسەك بار). 7 قوناق ۇيدە ورنالاسقان كارانتيندىك توسەك-ورىندار بوس تۇر.
ال Halyk Arena-داعى اۋرۋحاناعا 18 ادام ءتۇستى.
بىزدە Halyk Arena رەزەرۆتىك اۋرۋحانا رەتىندە ەسەپتەلەدى، ونى جاقىندا جيناستىرىپ تاستاعانبىز. Halyk Arena 1000 توسەككە ارنالعان، ياعني وندا 1000 ناۋقاس سىيادى. كەشەدەن بەرى Halyk Arena-عا ناۋقاستار قابىلدانىپ جاتىر، بۇگىن تاڭەرتەڭگى دەرەك بويىنشا، وندا 18 ناۋقاس بار. پاسيەنتتەردىڭ ءبىر بولىگى جاعدايلارى تۇراقتالعاننان كەيىن فتيزيوپۋلمونولوگيالىق ورتالىقتان ەمدەلۋگە اۋىستىرىلدى، كەيبىر ناۋقاستار جەدەل جاردەممەن كەلىپ ءتۇستى. مەن جەدەل جاردەممەن كەلگەندەرگە توقتالعىم كەلەدى. بۇل - شامامەن 30-35% -دى قۇرايتىن، تىنىس الۋىنىڭ تارتىلۋى سيپاتىنداعى اۋىرلىق دارەجەسى ورتاشا ناۋقاستار. بولاشاقتا، اۋرۋ دارەجەسى جەڭىل، ءبىراق قوسالقى اۋرۋلارى بار جانە جاسى ۇلكەن ناۋقاستار بولاتىن بولسا، ءبىز ولاردى دا سونداعى اۋرۋحاناعا جاتقىزاتىن بولامىز.
سۇلتانعازييەۆانىڭ ايتۋىنشا، كلينيكالار ەكى ەشەلونعا بولىنگەن. ءبىرىنشى ەشەلونعا جۇقپالى اۋرۋلار كلينيكالارى، سونىڭ ىشىندە مودۋلدىك اۋرۋحانالار كىرەدى. بۇل كلينيكالار - تەحنيكالىق جاعىنان جاقسى جابدىقتالعان جانە قۇرامى مىقتى. ءبىراق بۇگىندە ولار 80% -دان استام جۇكتەمەمەن جۇمىس ىستەپ جاتىر.
ەكىنشى ەشەلونعا ورتاشا اۋىرلىقتاعى ناۋقاستار جاتاتىن اۋرۋحانالار ەنەدى. Halyk Arena ەكىنشى ەشەلونعا جاتادى.
بۇگىنگى كۇنى جاڭاشا تۇرگە ەنگەن كوروناۆيرۋس ينفەكسياسى بۇرىنعىعا قاراعاندا قولايسىز، بۇل وتە اۋىر جانە اۋىرلىق دارەجەسى ورتاشا ناۋقاستاردىڭ سانىن كوبەيتىپ جاتىر. سوندىقتان ءبىز Halyk Arena-داعى اۋرۋحانانى ىسكە قوسۋعا ءماجبۇر بولدىق. ەگەر جۇكتەمە 70% -دان كوپ بولسا، ءبىز جاڭا كەرەۋەتتەر اكەلىپ قوسۋعا تىرىسامىز، - دەدى دەنساۋلىق ساقتاۋ باسقارماسىنىڭ وكىلى.
بۇگىن، 31 ناۋرىزدا، Halyk Arena سپورت كەشەنىنە كوروناۆيرۋسقا شالدىققان، اۋرۋنىنىڭ دەڭگەيى ورتاشا ناۋقاستار جەتكىزىلىپ جاتقانى بەلگىلى بولدى. بۇل سپورت كەشەنىندەگى اۋرۋحانا بىلتىر تامىزدا جيناقتالىپ الىنعان بولاتىن.
