قازاقستانداعى جول بويىنداعى قىزمەت كورسەتۋ نىساندارى — ءدامحانالار، جانارماي بەكەتتەرى مەن تەحنيكالىق ستانسيالار — ەندى بەكىتىلگەن ستاندارتتارعا ساي بولۋى مىندەتتەلەدى. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ مالىمدەدى، دەپ حابارلايدى Dalanews.kz.
ونىڭ ايتۋىنشا، كولىك، ساۋدا، ۇلتتىق ەكونوميكا، تۋريزم مينيسترلىكتەرى مەن جەرگىلىكتى اكىمدىكتەر كۇرە جولدار بويىنداعى سەرۆيس ساپاسىن جاقسارتۋدى جالعاستىرۋى قاجەت.
“جول بويىنداعى ءدامحانالار، جانارماي قۇيۋ بەكەتتەرى مەن تەحنيكالىق قىزمەت كورسەتۋ ستانسيالارى قابىلدانعان ستاندارتتارعا تولىق ساي كەلۋى ءتيىس. سونىمەن قاتار وسى سالادا جۇمىس ىستەيتىن كاسىپكەرلەردى ىنتالاندىرۋ جولدارىن قاراستىرۋدى تاپسىرامىن. تۋريستەردىڭ قاۋىپسىزدىگىنە ەرەكشە ءمان بەرىلۋى كەرەك”، — دەدى ۇكىمەت باسشىسى.
سونداي-اق پرەمەر-مينيستر ەل اۋماعىنداعى بارلىق ينفراقۇرىلىم — اۋەجايلار، قوناقۇيلەر، ساۋدا ورىندارى، قوعامدىق تاماقتانۋ نۇكتەلەرى مەن كونسەرت زالدارى — قاۋىپسىزدىك پەن جايلىلىق تالاپتارىنا ساي بولۋى كەرەگىن اتاپ ءوتتى.
ولجاس بەكتەنوۆ تۋريزم، مادەنيەت، دەنساۋلىق ساقتاۋ، ىشكى ىستەر مينيسترلىكتەرى مەن ارنايى مەملەكەتتىك ورگاندارعا مادەني، سپورتتىق جانە تۋريستىك ءىس-شارالاردى وتكىزۋدە جان-جاقتى قولداۋ كورسەتۋدى تاپسىردى.
“مۇنداي ءىس-شارالار ەلىمىزدىڭ حالىقارالىق ءيميدجىن نىعايتىپ، تۋريستەر مەن ينۆەستورلار ءۇشىن قازاقستاندى تارتىمدى ەتە تۇسەدى”، — دەدى پرەمەر-مينيستر.
