"مايقايىڭ" التىن كەنىشىندەگى اپاتتا ءىس-تۇزسىز جوعالعان ەكى قۇتقارۋشىنىڭ تۋىستارى كومەك سۇراپ استاناعا كەلدى، دەپ حابارلايدى Dalanews.kz.
اپاتتىڭ بولعانىنا ءۇش ايعا جۋىقتاسا دا، قۇتقارۋشى مەن اۆتوبۋس جۇرگىزۋشىسىنىڭ ءمايىتى ءالى تابىلمادى. ال ىزدەۋ جۇمىستارى توقتاپ تۇر.
كەنىشتە جوعالىپ كەتكەن قۇتقارۋشى ايدوس شايمەردەننىڭ ايەلى نۇرسۇلۋ شايمەردەن ءالى شەشىمىن تاپپاي جۇرگەن سۇراقتارعا جاۋاپ ىزدەپ، استاناعا كەلدى. ول مەملەكەتتىك ورگانداردان قۇتقارۋ جۇمىسىن جالعاستىرۋدى تالاپ ەتىپ وتىر.
“ىزدەستىرۋ جۇمىستارىنىڭ توقتاتىلعانىنا 39 كۇن، قايعىلى وقيعادان بەرى 89 كۇن ءوتتى. بالالار: "اكەم قايدا؟" دەپ سۇرايدى. اكەسى جوق. كۇنى-تۇنى كوز جاسىم قۇرعامايدى. كۇيەۋىمنىڭ اكەسى ينسۋلت الدى، ال ەنەمنىڭ قان قىسىمى بار. ولاردىڭ جالعىز ۇلى جوعالىپ كەتتى. ونى ءتىپتى جەرلەي الماي وتىرمىز”، – دەيدى اشىنعان ايەل كتك ارناسىنا بەرگەن سۇقباتىندا.
قۇتقارۋشى ايدوس شايمەردەن مەن جەدەل-قۇتقارۋ جاساعىنىڭ جۇرگىزۋشىسى ايىپ تىلەۋبەرگەننىڭ مايىتتەرى تابىلعان جوق. ءبىراق ولاردى ولدىگە ساناماعاندىقتان، جاقىندارىن دا جابىرلەنۋشى تاراپقا جاتقىزبايدى. ارنايى ساراپتاما جانە ونىڭ نەگىزىندە جاسالعان قۇتقارۋ جوسپارى بولماعاندىقتان ىزدەۋ جۇمىستارى ءالى توقتاپ تۇر.
ءىس-تۇسسىز جوعالعان قۇتقارۋشىلاردىڭ تۋىستارىنىڭ ايتۋىنشا، "مايقايىڭالتىن" كەنىشى جانە كاسىپورىندى قۇتقارۋ جاساقتارىمەن قامتاماسىز ەتكەن كاسىپتىك اسكەريلەندىرىلگەن اپاتتىق قۇتقارۋ قىزمەتى اراسىنداعى داۋعا بايلانىستى قۇجاتتار ءالى دايىن ەمەس. ەشقايسىسى قاجەتتى ساراپتامانى جاساۋدى ءوز موينىنا العىسى كەلمەيدى.
توتەنشە جاعدايلار مينيسترلىگى جاعدايعا قاتىستى پىكىر ءبىلدىردى.
“ءقازىر زاۋىت پەن كاسىپتىك اسكەريلەندىرىلگەن اپاتتىق قۇتقارۋ قىزمەتى ساراپتاماعا قاتىسى ساۋالدى شەشىپ جاتىر. سونداي-اق ولار سول جەردە بەلگىلى ءبىر جۇمىستاردى جۇرگىزىپ، قۇتقارۋشىلاردىڭ جۇمىسىن جالعاستىرۋ قانشالىقتى ءقاۋىپسىز بولاتىنى تۋرالى قورىتىندى جاساۋى كەرەك”، – دەيدى توتەنشە جاعداي ۆيسە-مينيسترى باۋىرجان سىزدىقوۆ.
ايدوس شايمەردەننىڭ اپكەسىنىڭ ايتۋىنشا، ۇكىمەت قۇتقارۋشىنىڭ 12 جاستاعى ەرەكشە كۇتىمدى قاجەت ەتەتىن قىزىنا 10، ەكى جاستاعى بالاسىنا 10 ميلليون تەڭگە وتەماقى تولەنەدى دەپ ۋادە بەرگەن. الايدا باسقا قۇتقارۋشىلاردىڭ وتباسى ماتەريالدىق وتەماقى السا، ايدوستىڭ وتباسىنا اقشالاي كومەك كورسەتىلمەگەن.
“"مايقايىڭالتىن" كەنىشى رەسمي وتىنىشتەر بەرىلدى، ولار ءوتىنىشتى قابىلدادى. ءبىراق ءبىر اي بولدى. جاۋاپ جوق. تەك “ماسەلە قاراستىرىلىپ جاتىر” دەپ قۇتىلادى”، – دەيدى ايناش ءماجيوتۆا.
وندىرىستەگى ەڭبەك قاۋىپسىزدىگى سالاسىن جانە ونىمەن بايلانىستى ماسەلەلەردى قاداعالايتىن يندۋستريا جانە قۇرىلىس ءمينيسترى دە جابىرلەنۋشى تاراپتىڭ جانايقايىنا قۇلاق ءتۇردى.
“ەڭ الدىمەن قۇتقارۋشىعا جۇمىس بەرۋگەن تۇلعا الەۋمەتتىك جاۋاپكەرشىلىك الۋ كەرەك. مەن وتەماقى ماسەلەسىن ەگجەي-تەگجەيلى تالقىلاعان جوقپىن... ال بۇل ماسەلە، وكىنىشكە وراي، تىكەلەي مەنىڭ مينيسترلىگىمنىڭ قۇزىرەتىنە جاتپايدى. ءبىراق مەن ماسەلەنى شەشۋ جۇمىستارىنا قاتىسۋعا دايىنمىن”، – دەدى يندۋستريا جانە قۇرىلىس ءمينيسترى قانات شارلاپايەۆ.
ەسكە سالايىق، بۇعان دەيىن "مايقايىڭ التىن" كەن ورنىندا ۇلكەن ويىق ماڭىنداعى توپىراق وپىرىلىپ، 4 ادام مىنگەن اۆتوبۋس جەردىڭ استىنا ءتۇسىپ كەتكەن بولاتىن.
