ساياساتتانۋشى ەدۋارد پولەتايەۆتىڭ ايتۋىگشا قازىرگى كۇنى رەسەي جەرىندە 13 ملن-نان اسا ەڭبەك ميگرانتتارى جۇمىس ىستەۋدە. بۇل جالپى ەڭبەككە جارامدى رەسەي حالقىنىڭ 13 پايىزى ەكەن. «مەن بىلسەم قازاقستان جانە رەسەيدىڭ ەڭبەك مينيسترلەرى ەڭبەك نارىعىنداعى ارىپتەستىك تۋرالى مەموراندۋمعا قول قويدى. بۇل ءوز كەزەگىندە ورتاق كاسىبي ستاندارتتار قۇرۋعا، ورتاق ەڭبەك نارىعىن جاساۋعا جول اشادى» دەدى پولەتايەۆ.
ال عالىم يرينا چەرنىح ءوز كەزەگىندە: «قازاقستاندا كوشى-قون ماسەلەسىمەن ءالى كۇنگە دەيىن كۇشتىك قۇرىلىمدار اينالىسىپ كەلەدى. نەگىزىندە بۇل ماسەلەگە كۇشتىك قۇرىلىمداردان تىس الەۋمەتتىك سالا قۇرىلىمدارىن، ونىڭ ىشىندە پسيحولوگتاردى، زاڭگەرلەردى، الەۋمەتتىك قىزمەتكەرلەردى جانە تاعى دا باسقا ماماندىق يەلەرىن كوپتەپ تارتۋ قاجەت. وسىنىڭ ارقاسىندا كوشىپ قونۋشىلار جاڭا جەرگە تەز بەيىمدەلىپ، تەز سىڭىسەتىن بولادى» دەدى.
ساياساتتانۋشى اندرەي چەبوتاريەۆ كۇنى كەشە عانا ەلىمىزدە كوشى-قون ساياساتىنىڭ 2017-2021 جىلدارعا ارنالعان تۇجىرىمداماسى قابىلدانعانىن ايتتى.
«قازاقستان اۋقىمدى جۇمىس كۇشىن قابىلداۋعا قانشالىقتى ءازىر؟ ەرتەڭگى كۇنى قازاقستاندىق جانە شەتەلدىك جۇمىسشىنىڭ اراسىندا كيكىلجىڭ تۋسا ۇكىمەت بۇل ماسەلەنى قالاي شەشپەك؟ مۇنداي كيكىلجىڭدەردىڭ ورىن العانى دا جاسىرىن ەمەس قوي؟ ال مۇنداي كەزدەرى ءتارتىپ پەن جۇيەنى قالاي جانە قانداي جولمەن قامتاماسىز ەتە الامىز؟ وسى جايىندا ويلاندىق پا؟»، – دەدى ساياساتتانۋشى.
جيىندى تۇيىندەگەن ساياساتتانۋشى رۇستام بۇرناشيەۆ بۇل رەتتە: «كوشى-قون ماسەلەسىنە كەلگەندە قازاقستاننىڭ دا، رەسەيدىڭ دە ناقتى ۇستانىمى جوق. ال وسى تۋرالى ماسەلە كوتەرىلگەندە ەكى جاقتىڭ ۇستانىمدارى كوبىنە كوپ قايشى كەلىپ جاتادى. سونىڭ ءبىرى زەينەتاقى تولەۋ ماسەلەسى. الەۋمەتتىك قامسىزداندىرۋ جولدارى جانە سىرتتان كەلۋشىلەردىڭ ديپلومىن قابىلداۋ ماسەلەسى» دەدى ول.
