مۇنى تۆيتتەردەگى پاراقشاسىندا توقايەۆتىڭ ءوزى جازدى.
“دۇنيەجۇزىلىك دەنساۋلىق ساقتاۋ ۇيىمى كوروناۆيرۋستى پاندەميا دەپ جاريالادى. ۇكىمەت ارنايى الدىن الۋ شارالارىن قولعا الادى. قوعامدىق ءىس-شارالار ۋاقىتشا توقتاتىلادى. ازاماتتار ازىق-تۇلىكپەن جانە ەڭ قاجەتتى تاۋارلارمەن ۇزدىكسىز قامتىلادى. شاعىن جانە ورتا بيزنەس زارداپ شەكپەۋى ءتيىس” – دەدى مەملەكەت باسشىسى.
بۇدان بولەك قازاقستاندا وتكىزىلەتىن بارلىق سپورتتىق شارالارعا شەكتەۋ قويىلدى.
ال ساۋدا ورتالىقتارى قالىپتى جۇمىس ىستەيدى، ورتالىقتارداعى كينوتەاترلار جۇمىسىن توقتاتادى.
كەلەسى اپتادان باستاپ وقۋشىلار مەن ستۋدەنتتەر كانيكۋلعا شىعادى (16 ناۋرىزدان 5 ساۋىرگە دەيىن).
دۇنيەجۇزىلىك دەنساۋلىق ساقتاۋ ۇيىمى كوروناۆيرۋستى ىندەت (پاندەميا) دەپ تانىدى. 11 ناۋرىزداعى جاعداي بويىنشا الەمدە جاڭا كوروناۆيرۋستىق ينفەكسيانى جۇقتىرعانداردىڭ جالپى سانى 114 ەلدە 118 مىڭ ادامدى قۇرادى. 4291 ناۋقاس قايتىس بولدى.
“قازاقستاندا ازىرگە كوروناۆيرۋس تىركەلگەن جوق. بارلىق ساقتىق شارالارىن قابىلداپ، ساقاداي-ساي وتىرمىز”، – دەدى وسىعان وراي وتكەن بريفينگتە پرەمەر-مينيستردىڭ ورىنباسارى ەرالى توعجانوۆ.
بۇدان بولەك ول بيىلعى ناۋرىز مەرەكەسى كوروناۆيرۋسقا بايلانىستى بۇقارالىق دەڭگەيدە تويلانبايتىنىن ايتتى.
“ادامداردىڭ ءۇي-ۇيدى ارالاپ، ءبىر-بىرىن مەرەكەمەن قۇتتىقتاۋىنا شەكتەۋ قويا المايمىز. ايتسە دە بيىل ناۋرىز مەرەكەسىن بۇقارالىق ورىنداردا، ونىڭ ىشىندە ادام قاراسى كوپ جينالاتىن جەردە تويلاۋعا تىيىم سالامىز. ازاماتتار ءوزىن عانا ەمەس، وتباسىن دا ويلاۋى كەرەك، قاۋىپسىزدىك باستى ورىندا”، – دەيدى توعجانوۆ.
كوروناۆيرۋسقا بايلانىستى “نۇر وتان” ساياسي كەڭەسىنىڭ وتىرىسى وتپەۋى مۇمكىن بە؟
بۇدان بۇرىن نازاربايەۆ پارتيانىڭ ساياسي كەڭەسىنىڭ وتىرىسى 18 ناۋرىزعا بەلگىلەنگەنىن ايتقان. وسى جيىندا “نۇر وتان” پارتياسىنان ءماجىلىستىڭ جانە بارلىق دەڭگەيدەگى ءماسليحاتتاردىڭ سايلاۋالدى پارتيالىق تىزىمدەرىنە كانديداتتار انىقتالادى دەپ جوسپارلانعان.
– پارتيا باسشىلىعى، ءماجىلىس پەن ءماسليحات دەپۋتاتتارى جەرگىلىكتى جەرلەردى ارالاۋعا ءتيىس، سونىڭ ىشىندە، شالعاي اۋداندارعا بارۋى كەرەك. ادامدارمەن كەزدەسىپ، پروبلەمالاردى جان-جاقتى زەردەلەۋ، ولاردى شەشۋ ماڭىزدى. بۇل ماسەلەلەردىڭ بارلىعى وڭىرلىك پارتيا باعدارلامالارىندا كورىنىس تابۋى قاجەت، – دەگەن بولاتىن بۇدان بۇرىن وسى وتىرىستىڭ كۇن ءتارتىبىن تالقىلاعان نازاربايەۆ.
ساياساتكەر مۇحتار تايجاننىڭ پىكىرىنشە كورونوۆيرۋس قاۋپىنە بايلانىستى “نۇر وتان” پارتياسى ساياسي كەڭەسىنىڭ وتىرىسىن وتكىزبەۋ كەرەك.
“ءبىز ەل تىزگىنىن ۇستاعان اسىل ازاماتتاردىڭ دەنساۋلىعىنا قاتەر ءتوندىرىپ، باسىن بايگەگە تىككەنىن قالامايمىز. قايدان بىلەسىز، الدەبىرەۋ وسى وتىرىسقا ەنىپ كەتىپ، ادەيىلەپ تۇشكىرىپ، جوتەلۋى ابدەن مۇمكىن…”، – دەيدى ءازىل-شىنى ارالاس مۇحتار تايجان.
قازىرگى كۇنى بيلەۋشى پارتيانىڭ 1 ملن-عا تارتا مۇشەسى بار. پارتيا ءتوراعاسى – نۇرسۇلتان نازاربايەۆ، ونىڭ ءبىرىنشى ورىنباسارى – باۋىرجان بايبەك.
ناۋرىزدىڭ 30-ى مەن 16-شى مامىر ارالىعىندا ەلدىڭ بارلىق وڭىرلەرىندەگى پارتيا مۇشەلەرى جاپپاي ىرىكتەلەدى. وسى ارقىلى ساياسي پارتيا كۇرمەۋى كوپ ماسەلەلەردى شەشەتىن ەڭ بەلسەندى جانە سەنىمدى مۇشەلەرىن تاڭداپ الماقشى.
نازاربايەۆ بۇدان بۇرىن “نۇر وتاننىڭ” ەلگە بەرگەن ۋادەسىن ورىندايتىنىن ايتقان.
ساياسي بيۋرونىڭ قۇرامىنا مىنا ازاماتتار كىرەدى:
قاسىم-جومارت توقايەۆ، پرەزيدەنت؛
داريعا نازاربايەۆا، سەنات ءتوراعاسى؛
نۇرلان نىعماتۋلين، ءماجىلىس ءتوراعاسى؛
اسقار مامين، ۇكىمەت باسشىسى؛
باۋىرجان بايبەك، Nur Otan پارتياسى ءتوراعاسىنىڭ ءبىرىنشى ورىنباسارى؛
اسەت يسەكەشيەۆ، پرەزيدەنت ءۋازىرى – قاۋىپسىزدىك كەڭەسىنىڭ حاتشىسى؛
مارات ءتاجين، قازاقستاننىڭ چەحياداعى ەلشىسى؛
ناتاليا گودۋنوۆا، ەسەپ كوميتەتىنىڭ ءتوراعاسى؛
دارحان ءقىدىرالى، “ەگەمەن قازاقستان” گازەتى باسقارما ءتوراعاسى؛
الەكساندر پاۆلوۆ “قازاقستان ۇلتتىق بانك” ديرەكتورلار كەڭەسىنىڭ ءتوراعاسى؛
داۋلەت كارىبەك، نۇر-سۇلتان قالاسى جاستار ساياساتى جونىندەگى باسقارما باسشىسى.
