مەملەكەت باسشىسى الەمنىڭ جاھاندىق ەكونوميكا مەن گەوساياسي احۋالدى قايتا وزگەرتۋدىڭ كۇردەلى كەزەڭىن باستان كەشىرىپ وتىرعانىن اتاپ ءوتتى. قازاقستاننىڭ الدىندا مۇلدەم جاڭا تالاپتار كەزەڭىندە ەكونوميكانى ورنىقتى دامۋ رەجيمىندە ساقتاۋ مىندەتى تۇر.
پرەمەر-مينيستر اسقار مامين ەل ەكونوميكاسىنا كەرى اسەر ەتەتىن سىرتقى فاكتورلاردى ازايتۋعا بايلانىستى ۇكىمەتتىڭ قابىلداپ جاتقان شارالارى تۋرالى باياندادى.
قاسىم-جومارت توقايەۆ كوروناۆيرۋستىڭ تارالۋىنا قارسى كۇرەس جونىندەگى شەشىمنىڭ اقتالعانىن جانە دەر كەزىندە قابىلدانعانىن، ونىڭ وتانداستارىمىزدىڭ دەنساۋلىعىن ساقتاۋعا باعىتتالعانىن اتاپ ءوتتى.
توقايەۆتىڭ 7 تاپسىرماسى
وسى جيىندا توقايەۆ تومەندەگى تاپسىرمالاردى بەردى:
1. كاسىپورىندار مەن مەكتەپكە دەيىنگى مەكەمەلەر قىزمەتكەرلەرىنىڭ مەديسينالىق قاۋىپسىزدىگىن قامتاماسىز ەتۋگە قاتىستى قوسىمشا شارالار قابىلداۋ قاجەت دەپ سانايدى.
2. ۇيىندە وتىرۋعا ءماجبۇر اتا-انالاردىڭ بىرىنە اقىلى ەڭبەك دەمالىسىن بەرۋ قاجەتتىگىن جۇمىس بەرۋشىلەرگە ءتۇسىندىرۋ قاجەت. ۇكىمەت فيسكالدى مەحانيزمدەر ارقىلى كاسىپورىندارعا قولداۋ كورسەتۋ شارالارىن قابىلداۋى كەرەك.
3. پرەزيدەنت مەديسينالىق مەكەمەلەر مەن ازاماتتاردى دارى-دارمەكتەرمەن قامتاماسىز ەتۋ ماسەلەسىن شۇعىل شەشۋدى، مەديسينالىق نىسانداردىڭ دايىندىعىن تەكسەرۋدى تالاپ ەتتى.
4. مەملەكەتتىك قىزمەتشىلەر مەن باسقا دا لاۋازىمدى تۇلعالاردىڭ شەتەلدەرگە ىسساپارمەن بارۋىنا تىيىم سالىنادى، تەك ازاماتتارىمىز بەن ەلىمىزدىڭ قاۋىپسىزدىگىن قامتاماسىز ەتۋگە باعىتتالعان ساپارلارعا عانا رۇقسات بەرىلەدى.
پرەزيدەنت ەلىمىزدىڭ الەۋمەتتىك-ەكونوميكالىق دامۋىنا جانە بيۋدجەت شىعىندارىنا قاتىستى بولجامدى قىسقا مەرزىمدە قايتا قاراۋدى تاپسىردى.
5. بيۋدجەت شىعىندارىن حالىقتى جۇمىسپەن قامتۋعا، شاعىن جانە ورتا بيزنەستى قولداۋعا باعىتتاپ، قايتا قاراۋ كەرەك.
6. ۇكىمەتكە وتاندىق ءونىم وندىرۋشىلەرگە باسىمدىق بەرە وتىرىپ، تاۋارلار مەن قىزمەت تۇرلەرىن ساتىپ الۋدىڭ تىكەلەي جانە اشىق جۇيەسىنە كوشۋگە ءتيىس.
7. ۇكىمەت وتاندىق ءىرى كاسىپورىندارمەن بىرلەسىپ، ءوندىرىستى قولداۋ جانە كەڭەيتۋ، جۇمىس ورىندارىن ساقتاۋ بويىنشا داعدارىسقا قارسى ماقساتتى جوسپار ازىرلەيدى.
جۇرتتى جۇمىسپەن قامتۋعا 300 ملرد تەڭگە بولىنەدى
مەملەكەت باسشىسى وتاندىق تاۋارلاردى جانە جۇمىس كۇشىن پايدالانا وتىرىپ، ينفراقۇرىلىمداردى جوندەۋدى، الەۋمەتتىك نىساندار مەن جەرگىلىكتى جولدار سالۋدى كوزدەيتىن جۇمىسپەن قامتۋدىڭ جول كارتاسىن جۇزەگە اسىرۋعا كەمىندە 300 ميلليارد تەڭگە ءبولۋ جونىندە تاپسىرما بەردى.
قارجى نارىعىن رەتتەۋ جانە دامىتۋ اگەنتتىگىنە ۇلتتىق بانكپەن بىرلەسىپ، قازاقستاندىق بيزنەسكە نەسيە بەرۋ كولەمىن ازايتپاۋ جونىندە شارالار قابىلداۋعا تاپسىرما بەرىلدى.
ايماق اكىمدەرى ازىق-تۇلىك پەن قىزمەت تۇرلەرىنىڭ باعاسىن باقىلاۋ جۇمىستارىن بەلسەندى جۇرگىزۋى كەرەك.
سونىمەن قاتار پرەزيدەنت مەملەكەتتىك ورگانداردى جەكەلەگەن تاۋارلاردىڭ سۇرانىسىنا دۇربەلەڭ تۋدىرماي، بوس ۇرەي مەن الىپ-قاشپا ءسوزدىڭ الدىن الۋ ءۇشىن ءاقپاراتتىق-تۇسىندىرۋ جۇمىستارىن بەلسەندى جۇرگىزۋگە، ونىڭ ىشىندە، الەۋمەتتىك جەلىلەرگە ايرىقشا كوڭىل بولۋگە شاقىردى.
قاسىم-جومارت توقايەۆتىڭ ايتۋىنشا، ەلىمىزدىڭ ازىق-تۇلىك قورى قازاقستان حالقىنىڭ قاجەتتىلىگىن تولىق قامتاماسىز ەتە الادى، تۇتىنۋ تاۋارلارىنا قاتىستى ەشقانداي تاپشىلىق بولمايدى.
