Memleket basshysy álemniń jahandyq ekonomika men geosaiasi ahýaldy qaita ózgertýdiń kúrdeli kezeńin bastan keshirip otyrǵanyn atap ótti. Qazaqstannyń aldynda múldem jańa talaptar kezeńinde ekonomikany ornyqty damý rejiminde saqtaý mindeti tur.
Premer-Ministr Asqar Mamin el ekonomikasyna keri áser etetin syrtqy faktorlardy azaitýǵa bailanysty Úkimettiń qabyldap jatqan sharalary týraly baiandady.
Qasym-Jomart Toqaev koronavirýstyń taralýyna qarsy kúres jónindegi sheshimniń aqtalǵanyn jáne der kezinde qabyldanǵanyn, onyń otandastarymyzdyń densaýlyǵyn saqtaýǵa baǵyttalǵanyn atap ótti.
Toqaevtyń 7 tapsyrmasy
Osy jiynda Toqaev tómendegi tapsyrmalardy berdi:
1. Kásiporyndar men mektepke deiingi mekemeler qyzmetkerleriniń meditsinalyq qaýipsizdigin qamtamasyz etýge qatysty qosymsha sharalar qabyldaý qajet dep sanaidy.
2. Úiinde otyrýǵa májbúr ata-analardyń birine aqyly eńbek demalysyn berý qajettigin jumys berýshilerge túsindirý qajet. Úkimet fiskaldy mehanizmder arqyly kásiporyndarǵa qoldaý kórsetý sharalaryn qabyldaýy kerek.
3. Prezident meditsinalyq mekemeler men azamattardy dári-dármektermen qamtamasyz etý máselesin shuǵyl sheshýdi, meditsinalyq nysandardyń daiyndyǵyn tekserýdi talap etti.
4. Memlekettik qyzmetshiler men basqa da laýazymdy tulǵalardyń shetelderge issaparmen barýyna tyiym salynady, tek azamattarymyz ben elimizdiń qaýipsizdigin qamtamasyz etýge baǵyttalǵan saparlarǵa ǵana ruqsat beriledi.
Prezident elimizdiń áleýmettik-ekonomikalyq damýyna jáne biýdjet shyǵyndaryna qatysty boljamdy qysqa merzimde qaita qaraýdy tapsyrdy.
5. Biýdjet shyǵyndaryn halyqty jumyspen qamtýǵa, shaǵyn jáne orta biznesti qoldaýǵa baǵyttap, qaita qaraý kerek.
6. Úkimetke otandyq ónim óndirýshilerge basymdyq bere otyryp, taýarlar men qyzmet túrlerin satyp alýdyń tikelei jáne ashyq júiesine kóshýge tiis.
7. Úkimet otandyq iri kásiporyndarmen birlesip, óndiristi qoldaý jáne keńeitý, jumys oryndaryn saqtaý boiynsha daǵdarysqa qarsy maqsatty jospar ázirleidi.
Jurtty jumyspen qamtýǵa 300 mlrd teńge bólinedi
Memleket basshysy otandyq taýarlardy jáne jumys kúshin paidalana otyryp, infraqurylymdardy jóndeýdi, áleýmettik nysandar men jergilikti joldar salýdy kózdeitin Jumyspen qamtýdyń jol kartasyn júzege asyrýǵa keminde 300 milliard teńge bólý jóninde tapsyrma berdi.
Qarjy naryǵyn retteý jáne damytý agenttigine Ulttyq bankpen birlesip, qazaqstandyq bizneske nesie berý kólemin azaitpaý jóninde sharalar qabyldaýǵa tapsyrma berildi.
Aimaq ákimderi azyq-túlik pen qyzmet túrleriniń baǵasyn baqylaý jumystaryn belsendi júrgizýi kerek.
Sonymen qatar Prezident memlekettik organdardy jekelegen taýarlardyń suranysyna dúrbeleń týdyrmai, bos úrei men alyp-qashpa sózdiń aldyn alý úshin aqparattyq-túsindirý jumystaryn belsendi júrgizýge, onyń ishinde, áleýmettik jelilerge airyqsha kóńil bólýge shaqyrdy.
Qasym-Jomart Toqaevtyń aitýynsha, elimizdiń azyq-túlik qory Qazaqstan halqynyń qajettiligin tolyq qamtamasyz ete alady, tutyný taýarlaryna qatysty eshqandai tapshylyq bolmaidy.
