«كەلەسى 12 ايدا حالىقتىڭ 80 پايىزىنا دەيىن Covid-19 جۇقتىرىپ، 15 پايىزعا دەيىن (7،9 ميلليون ادام) اۋرۋحاناعا جاتقىزىلادى دەگەن بولجام بار» دەپ جازىلعان تابىلعان قۇجاتتا، ونى The Guardian جاريالادى.
اقپارات بويىنشا، قۇجات اۋرۋحانا باسشىلارى مەن NHS اعا دارىگەرلەرىنە تاراتىلعان. قۇجاتتى انگليا ازاماتتارىنىڭ دەنساۋلىق قاۋىپسىزدىگىن قامتاماسىز ەتەتىن ساراپشىلار توبى جاساعان.
باسىلىم وكىلدەرى قۇجاتتى انگليانىڭ دەنساۋلىق ساقتاۋ مينيسترلىگىنىڭ ساراپشىسى تەكسەرگەنىن جانە راستاعانىن ايتادى.
ۇلىبريتانيادا ۆيرۋس جۇقتارعاندار سانى الداعى اپتالار مەن ايلاردا ۇدايى ءوسىپ وتىرادى، ال مامىردىڭ سوڭى مەن ماۋسىمنىڭ ورتاسىنا دەيىن ولاردىڭ سانى شارىقتاۋ شەگىنە جەتەدى دەپ بولجاندى.
ەسكە سالايىق، 15 ناۋرىزدا ۇلىبريتانيا دەنساۋلىق ساقتاۋ مينيسترلىگى ۆيرۋس جۇقتىرعانداردىڭ سانى 1372-گە دەيىن وسكەنىن، ال قايتىس بولعانداردىڭ سانى 35 ادامعا جەتكەنىن جانە 14 پاسيەنت اعزاسىنان COVID-19 انىقتالعان سوڭ قايتىس بولعانىن حابارلاعان بولاتىن.
دەنساۋلىق ساقتاۋ ءمينيسترى مەتت حەنكوك 70 جاستان اسقان بريتانيالىق قارت كىسىلەردىڭ بارلىعى ءتورت ايعا دەيىن وقشاۋلانۋى ءتيىس ەكەنىن راستادى. سونداي-اق، بۇل قادام الداعى اپتادا جاريالاناتىنىن ايتتى.
