وڭتۇستىك كورەيانىڭ يوسۋ قالاسىندا ءوتىپ جاتقان «Korea Glocal Education Fair – 2024» كورمەسىندە زياتكەرلىك مەكتەپتەردىڭ BeyimTech جۇيەسى كوپشىلىك نازارىنا ۇسىنىلىپ، قاتىسۋشىلاردىڭ قىزىعۋشىلىعىن تۋدىردى.
جارمەڭكە ساراپشىلار مەن ءبىلىم بەرۋ كوشباسشىلارىن، ۋنيۆەرسيتەتتەر، كوللەدجدەر، مەكتەپتەر مەن ءتىل ورتالىقتارىنان بولەك، ءارتۇرلى ءبىلىم بەرۋ مەكەمەلەرىنىڭ وكىلدەرى مەن ستۋدەنتتەردى، اتا-انالاردى دا قامتىدى.
ايتۋلى شارادا «نازاربايەۆ زياتكەرلىك مەكتەپتەرى» دببۇ BeyimTech ەنشىلەس ۇيىمىنىڭ ديرەكتورى نۇرسۇلتان دۇيسەبايەۆ Beyim جۇيەسىندەگى Beyim.ai جانە Beyim Synaq سيفرلىق جوبالارىنا جەكە-جەكە توقتالىپ، كورمە قاتىسۋشىلارىنا ساندىق تەحنولوگيا كومەگىنىڭ يگىلىكتەرى جايىندا باياندادى.
Beyim.ai – بۇل «نازاربايەۆ زياتكەرلىك مەكتەپتەرى» دببۇ ستراتەگيالىق سەرىكتەسى – Arizona State University-مەن بىرلەسە ازىرلەنگەن بىرەگەي ادىستەمە بويىنشا قۇرىلعان جەلى. ونىڭ ەرەكشەلىگى – Instagram الەۋمەتتىك جەلىسى سياقتى اقپاراتتى لەنتالىق تۇردە ۇسىنۋىندا. ميكرووقىتۋ ءادىسى قولدانىلعان بۇل جوبادا اۆتورلىق قۇرالدار، وقىتۋدىڭ جەكە تراەكتورياسى، وقۋ اناليتيكاسى جانە تاعى دا باسقا مۇمكىندىكتەر قاراستىرىلعان.
Beyim Synaq – وقۋشىلارعا ىڭعايلى ۋاقىتتا جانە كەز-كەلگەن جەردە تەستىلەۋدەن وتۋگە ارنالعان بالاماسى جوق جوبا. قولدانبادا اقىسىز جانە اقىلى تەست نۇسقالارى بار.
– بيىلدان باستاپ NIS-كە تەستىلەۋ سىناعىن ونلاين تاپسىرۋعا بولادى. بۇل مۇمكىندىكتى 5530 ۇمىتكەر پايدالانىپ ۇلگەردى. جاڭا ءونىم ءبىرقاتار ارتىقشىلىقتارىمەن ەرەكشەلەنەدى. جولعا ۋاقىت پەن اقشا جۇمساۋدىڭ قاجەتى جوق، باسقا قالادا، اۋىلدا تۇرىپ-اق تەستىلەۋدەن وتۋگە بولادى. ناتيجەلەردى كۇتۋدىڭ دە قاجەتى جوق، ولار تەستىلەۋ اياقتالعان بويدان بىردەن شىعادى. بۇل، ەڭ الدىمەن، اۋىلدىق جانە شالعاي اۋدانداردىڭ وقۋشىلارى ءۇشىن ىڭعايلى. قازاقستان اۋدانى بويىنشا وڭتۇستىك كورەيادان 27 ەسە ۇلكەن. سوندىقتان مۇنداي جوبا بىزگە قاجەت بولدى. جاڭا تەحنولوگيالار قاشىقتىقتى قىسقارتۋدا، — دەدى BeyimTech ديرەكتورى نۇرسۇلتان دۇيسەبايەۆ.
ءوز كەزەگىندە، ءبىلىم باسقارماسىنىڭ مەكتەپكە دەيىنگى جانە باستاۋىش ءبىلىم بەرۋ ءبولىمىنىڭ ديرەكتورى چحۋنچحۋنبۋكدو چحە سۋك حي كورمەگە قاتىسقان قازاقستان وكىلدەرى مەن BeyimTech جوباسىنىڭ جۇمىسىنا ساتتىلىك تىلەدى.
