وڭتۇستىك كورەياداعى مۋان اۋەجايىندا Jeju Air جولاۋشىلار ۇشاعىنىڭ اپاتقا ۇشىراۋىنان قايتىس بولعاندار سانى 85 ادامعا دەيىن ءوستى، - دەپ حابارلايدى Dalanews.kz Yonhap News-كە سىلتەپ.
اگەنتتىك مالىمەتىنشە، ۇشاق اپاتىنان 85 ادام قازا تاپقان جانە جاقىن ارادا قۇربان بولعاندار سانى كۇرت ءوسۋى مۇمكىن. ازىرگە ەكى ادام قۇتقارىلعانى حابارلاندى: ءبىر ەكيپاج مۇشەسى جانە ءبىر جولاۋشى.
قۇتقارىلعان ەكى ادامنان باسقا ۇشاقتا بولعان بارلىق ادام قايتىس بولدى دەگەن نۇسقا دا جوققا شىعارىلمايدى.
بانگكوكتان ورالعان Jeju Air اۋەكومپانياسىنىڭ بورتىندا بارلىعى 181 ادام بولدى، ونىڭ ىشىندە التى ەكيپاج مۇشەسى بار. جولاۋشىلاردىڭ كوپشىلىگى كورەيا ازاماتتارى بولدى. تايلاندتىڭ ەكى ازاماتى بار.
جەرگىلىكتى تەلەارنالار كورسەتكەن ۆيدەودا ۇشاق بوساتىلعان ءشاسسيسىز قونۋعا تىرىسىپ جاتقانىن كورۋگە بولادى. ۇشاق جەرگە سىرعىپ، بەتون قابىرعاعا سوعىلىپ، جارىلعان، سودان كەيىن ونى جالىن شارپىدى.
ۇشاق جارىلىستان تولىعىمەن دەرلىك جويىلدى. اپات ورنىنا 80-گە جۋىق ءورت ءسوندىرۋشى جىبەرىلدى. ىزدەۋ-قۇتقارۋ جۇمىستارى جۇرگىزىلىپ جاتىر.
قازاقستاننىڭ ءسىم رەسمي وكىلى ايبەك سمادياروۆتىڭ سوزىنشە، الدىن الا مالىمەتتەر بويىنشا ۇشاق بورتىندا قازاقستاندىقتار بولعان جوق.
"جەرگىلىكتى بيلىكتىڭ الدىن الا دەرەكتەرى بويىنشا وڭتۇستىك كورەيادا اپاتقا ۇشىراعان ۇشاق جولاۋشىلارى اراسىندا قازاقستان ازاماتتارى بولعان جوق"، - دەپ جازىلعان حابارلامادا.
ايتا كەتەيىك، Jeju Air اۋەكومپانياسىنىڭ ۇشاعى ۇشۋ-قونۋ جولاعىندا ۇشپاي، مۋان حالىقارالىق اۋەجايىنا قونعان كەزدە قورشاۋعا سوعىلعان. اۋە اپاتى تاڭعى 9:07-دە (استانا ۋاقىتى بويىنشا 5:07) بولدى.
