وڭتٷستٸك كورەيانىڭ انسان قالاسىندا 20 جاستاعى قازاقستان ازاماتى مەيرامحانادان اقشا قولدى ەتٸپ, پوليتسييانىڭ قولىنا تٷستٸ. ۇرى قىلمىس ورنىنان قاشقانىمەن, نەبەرٸ 10 مينۋت ٸشٸندە ۇستالدى, دەپ حابارلايدى Dalanews.kz.
وقيعا تاڭعى 9 شاماسىندا بولعان. جٸگٸت مەيرامحانا تەرەزەسٸنەن كٸرٸپ, كاسساداعى سەيفتەن 420 مىڭ ۆون, ال قايىرىمدىلىق جەشٸگٸنەن تاعى شامامەن 70 مىڭ ۆون الىپ كەتكەن. تەڭگەگە شاققاندا جالپى 191 000 تەڭگە ۇرلاپ كەتكەن.
جۇمىسقا دايىندىققا كەلگەن مەيرامحانا يەسٸ بەيتانىس ادامدى بايقاپ قالىپ, سۇراق قويا بەرگەندە ول اقشانى الىپ, قاشىپ كەتكەن.
يەسٸ ارتىنان قۋسا دا, ۇرى تار كٶشەلەرگە كٸرٸپ كٶزدەن تاسا بولعان. ابىروي بولعاندا, مەيرامحانا يەسٸ جولاي پوليتسييا پاترۋلٸنە كەزٸگٸپ, كٶمەك سۇراعان.
پوليتسەيلەر دەرەۋ ٸزدەۋگە كٸرٸسكەن. بٸرٸ كٷدٸكتٸنٸ جاسىل ايماق ارقىلى 500 مەتر بويى جاياۋ قۋسا, ەكٸنشٸسٸ كٶلٸكپەن الدىن بٶگەپ, نەتيجەسٸندە 9:20-دا ونى قىلمىس ٷستٸندە ۇستادى.
پوليتسييا قازاقستاندىق ازامات 2024 جىلى كورەياعا جۇمىس ٸستەۋگە كەلگەنٸن انىقتاعان, قۇرىلىس الاڭدارىندا جالدامالى جۇمىسشى بولىپ ٸستەگەن. سوڭعى ۋاقىتتا جۇمىسسىز قالىپ, مونشادا تٷنەگەن. تەرگەۋدە ول ۇرلىقتى قازاقستانعا قايتۋعا بيلەت ساتىپ الۋ ٷشٸن جاساعانىن مويىنداعان.
