قۇنى 12 ملن. تەڭگەلىك ءۇيدىڭ كولەمى 120 شارشى مەتردى قۇرايدى. سەگىز بالالى انانىڭ جاي-كۇيىمەن تانىسقان اۋداندىق «جاستار رەسۋرستىق ورتالىعىنىڭ» قىزمەتكەرلەرى قۇرىلىس جۇمىستارىن ۇيىمداستىرىپ، دەمەۋشىلەر ىزدەپ، ىزگى ءىستىڭ باسى – قاسىندا ءجۇردى. تۇرعىن ءۇي زاماناۋي ۇلگىدە تولىق ارلەنگەن.
كوپبالالى انانىڭ قۋانىشىمەن بولىسۋگە اۋدان اكىمى تولەگەن تەلعارايەۆ ارنايى بارىپ، دەمەۋشىلىك جاساعان ازاماتتارعا العىسىن جەتكىزدى.
– بۇل جۇمىستار ەلباسىمىز نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىن ىسكە اسىرۋ ماقساتىندا ءارى ازاماتتاردىڭ بويىندا وتانعا دەگەن جاۋاپكەرشىلىك سەزىمىن جانە الەۋمەتتىك بەلسەندىلىگىن ارتتىرۋ ءۇشىن ۇيىمداستىرىلىپ وتىر. ەلىمىزدە جىلاعاندى جۇباتاتىن، سۇرىنگەنگە قول ۇشىن بەرەتىن جانى جومارت، قايىرىمدى ازاماتتارىمىزدىڭ وسىنداي ساۋاپتى ىستەرى كوپ بولا بەرسىن، – دەگەن اۋدان باسشىسى قۋانىش يەلەرىنە گاز پليتاسىن تارتۋ ەتتى.
جاستاردىڭ يگى باستاماسىنا اۋداندىق ارداگەرلەر كەڭەسىنىڭ ءتوراعاسى ءاتىرحان شىڭعىسبايەۆ العىسىن ايتىپ، باتاسىن بەردى. قونىس توي يەسى مادينا نابييەۆا باسپانا سالىپ بەرگەن دەمەۋشىلەرگە ريزاشىلىعىن ءبىلدىردى. ايتا كەتەرلىگى، مادينانىڭ ومىرلىك جارى ومىردەن وتكەن سوڭ سەگىز بالانى جالعىز ءوزى تاربيەلەۋدە. كوپبالالى انا وسى ۋاقىتقا دەيىن اۋىلداعى توزىعى جەتكەن ءۇيدى پانالاپ كەلگەن بولاتىن.
