كونستيتۋسيالىق كوميسسيانىڭ ءتورتىنشى وتىرىسىندا ۇسىنىلىپ وتىرعان نەگىزگى وزگەرىستەر جاريا ەتىلدى. تۇزەتۋلەردىڭ مازمۇنىن كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ تانىستىردى، دەپ حابارلايدى Dalanews.kz.
ونىڭ ايتۋىنشا، جوسپارلانعان وزگەرىستەر قازاقستان كونستيتۋسياسى ءماتىنىنىڭ باسىم بولىگىن قامتيدى. اتاپ ايتقاندا، نەگىزگى زاڭنىڭ 84 پايىزىنا تۇزەتۋ ەنگىزۋ كوزدەلگەن. قۇجاتقا «حالىق كەڭەسى» جانە «كونستيتۋسياعا وزگەرىستەر مەن تولىقتىرۋلار ەنگىزۋ» اتتى ەكى جاڭا ءبولىم قوسىلادى. سونىمەن قاتار قازىرگى قولدانىستاعى ءتورت ءبولىمنىڭ اتاۋى جاڭارتىلادى.
كونستيتۋسيانىڭ پرەامبۋلاسى دا تولىقتاي قايتا جازىلماق. جاڭا رەداكسيادا قازاقستان ادامدى، ونىڭ ءومىرىن، قۇقىقتارى مەن بوستاندىقتارىن ەڭ جوعارى قۇندىلىق رەتىندە مويىندايتىن دەموكراتيالىق، زايىرلى، قۇقىقتىق ءارى الەۋمەتتىك مەملەكەت رەتىندە ايقىندالادى.
ۇسىنىلعان تۇزەتۋلەردە وتباسىلىق قۇندىلىقتاردى ساقتاۋ، ازاماتتاردىڭ قۇقىقتارى مەن بوستاندىقتارىن قورعاۋ تەتىكتەرىن كۇشەيتۋگە ەرەكشە ءمان بەرىلگەن. اتاپ ايتقاندا، ادام ءومىرىنىڭ ۇستەم قۇندىلىق ەكەنى، جەكە دەرەكتەردى قورعاۋ، جەكە تۇلعانىڭ قول سۇعىلماۋى، الەۋمەتتىك قولداۋدى ارتتىرۋ جانە قۇقىقتىق ايقىندىق قاعيداتتارى كونستيتۋسيالىق دەڭگەيدە بەكىتىلەدى.
سونىمەن قاتار قازاقستاننىڭ حالىق كەڭەسى بۇكىل حالىقتىڭ مۇددەسىن بىلدىرەتىن وكىلدى ورگان رەتىندە بەلگىلەنبەك. قۇرىلتايدىڭ سەسسيالارىن وتكىزۋ مەن ونىڭ قىزمەتىن ۇيىمداستىرۋعا قاتىستى نورمالار قايتا قارالادى. زاڭ جوبالارىن ۇسىنۋ قۇقىعى بار باستاماشىلاردىڭ ءتىزىمى كەڭەيىپ، زاڭمەن رەتتەلەتىن قوعامدىق قاتىناستار اياسى ۇلعايادى. حالىق كەڭەسىنە زاڭ شىعارۋ باستاماسى قۇقىعىن بەرۋ ۇسىنىلىپ وتىر.
بۇدان بولەك، جەدەل ەكونوميكالىق دامۋ ايماقتارى ءۇشىن ارنايى قۇقىقتىق رەجيم ەنگىزۋ ماسەلەسى قاراستىرىلۋدا. بۇل نورما «استانا» حالىقارالىق قارجى ورتالىعى مەن الاتاۋ قالاسىنا قاتىستى بولماق. دەگەنمەن ۇسىنىس ەل ەكونوميكاسىن ىنتالاندىرۋعا باعىتتالعانىمەن، مەملەكەتتىڭ ۋنيتارلىق سيپاتى، اۋماقتىق تۇتاستىعى، قول سۇعىلماۋى جانە بولىنبەيتىندىگى تۋرالى نەگىزگى قاعيداتتار وزگەرىسسىز قالاتىنى اتاپ ءوتىلدى.
ەسكە سالايىق، بۇعان دەيىن ساراپشىلار كونستيتۋسياداعى جاڭا ۇسىنىستاردى سىنعا العان ەدى.
