قاسىم-جومارت توقايەۆ كونستيتۋسيالىق كوميسسيا ءتوراعاسى – كونستيتۋسيالىق سوت ءتوراعاسى ەلۆيرا ءازىموۆانى، كونستيتۋسيالىق كوميسسيا ءتوراعاسىنىڭ ورىنباسارى – مەملەكەتتىك كەڭەسشى ەرلان ءقاريندى جانە كونستيتۋسيالىق كوميسسيا مۇشەسى – پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنبايەۆتى قابىلدادى، دەپ حابارلايدى Dalanews.kz.
مەملەكەت باسشىسىنا كوميسسيانىڭ جاڭا كونستيتۋسيا جوباسى بويىنشا اتقارعان جۇمىسى تۋرالى مالىمەت بەرىلدى.
ەلۆيرا ءازىموۆا كوميسسيانىڭ وسىعان دەيىن وتكەن ون ەكى وتىرىسىنىڭ ناتيجەسىندە جاڭا اتا زاڭنىڭ قورىتىندى جوباسى ازىرلەنگەنىن باياندادى.
جاڭا كونستيتۋسيا ءماتىنى ازاماتتار مەن ساراپشىلاردىڭ بىلتىر قازان ايىنان باستاپ eGov جانە e-Otinish پورتالدارىنا جولداعان باستامالارى نەگىزىندە دايىندالدى. سونداي-اق جوبادا پارلامەنتتىك رەفورما جونىندەگى جۇمىس توبى قازان-قاڭتار ايلارى ارالىعىندا جيناقتاعان تاسىلدەر دە ەسكەرىلدى.
ەلۆيرا ءازىموۆا كونستيتۋسيالىق كوميسسيا تالقىلاۋ قورىتىندىسى بويىنشا جاڭا كونستيتۋسيا جوباسىن جالپىحالىقتىق رەفەرەندۋمعا شىعارۋدى ۇسىناتىنىن جەتكىزدى.
مەملەكەت باسشىسى كونستيتۋسيالىق كوميسسيانىڭ وتە اۋقىمدى ءارى ماڭىزدى جۇمىس اتقارعانىن اتاپ ءوتتى. پرەزيدەنتتىڭ پىكىرىنشە، جاڭا كونستيتۋسيا ەرەجەلەرى مەملەكەتىمىزدىڭ ينستيتۋسيونالدىق نەگىزىن ترانسفورماسيالاۋ ۇدەرىسى تولىعىمەن اياقتالىپ، مۇلدە جاڭا كونستيتۋسيالىق ۇلگىگە كوشەتىنىن كورسەتەدى.
قاسىم-جومارت توقايەۆ جاڭا اتا زاڭ جوباسى قوعامداعى وزەكتى قۇندىلىقتار مەن مەملەكەتتىك ساياسات قاعيداتتارىن ايقىنداپ قانا قويماي، قازاقستاننىڭ ودان ءارى پروگرەسسيۆتى دامۋىنا نەگىز قالايتىنىن ايتتى.
پرەزيدەنت ماڭىزدى جۇمىستى كاسىبي تۇرعىدا اتقارعان كونستيتۋسيالىق كوميسسيا مۇشەلەرىنە ريزاشىلىعىن ءبىلدىردى. سونداي-اق كوميسسيا مۇشەلەرىنىڭ جاڭا كونستيتۋسيا جوباسىن تىكەلەي ەفيردە تالقىلاۋى قوعامدىق ديالوگتىڭ جوعارى دەڭگەيىن تانىتقانىنا نازار اۋداردى.
بۇدان بولەك، مەملەكەت باسشىسى جوبانى ازىرلەۋ مەن تالقىلاۋعا مىڭداعان ازاماتتىڭ بەلسەنە اتسالىسقانىنا توقتالىپ، بۇل «حالىق ۇنىنە قۇلاق اساتىن مەملەكەت» تۇجىرىمداماسىنا ساي كەلەتىنىن جانە جاڭا كونستيتۋسيانىڭ شىنايى حالىقتىق سيپاتىن كورسەتەتىنىن اتاپ ءوتتى.
قاسىم-جومارت توقايەۆ تاياۋ ارادا جاڭا كونستيتۋسيانى قابىلداۋ بويىنشا رەسپۋبليكالىق رەفەرەندۋم وتكىزۋ تۋرالى جارلىققا قول قوياتىنىن مالىمدەدى.
