Qasym-Jomart Toqaev Konstıtýsıalyq komısıa tóraǵasy – Konstıtýsıalyq sot tóraǵasy Elvıra Ázimovany, Konstıtýsıalyq komısıa tóraǵasynyń orynbasary – Memlekettik keńesshi Erlan Qarındi jáne Konstıtýsıalyq komısıa múshesi – Prezıdenttiń quqyqtyq máseleler jónindegi kómekshisi Erjan Jıenbaevty qabyldady, dep habarlaıdy Dalanews.kz.
Memleket basshysyna Komısıanyń jańa Konstıtýsıa jobasy boıynsha atqarǵan jumysy týraly málimet berildi.
Elvıra Ázimova Komısıanyń osyǵan deıin ótken on eki otyrysynyń nátıjesinde jańa Ata Zańnyń qorytyndy jobasy ázirlengenin baıandady.
Jańa Konstıtýsıa mátini azamattar men sarapshylardyń byltyr qazan aıynan bastap eGov jáne e-Otinish portaldaryna joldaǵan bastamalary negizinde daıyndaldy. Sondaı-aq jobada Parlamenttik reforma jónindegi jumys toby qazan-qańtar aılary aralyǵynda jınaqtaǵan tásilder de eskerildi.
Elvıra Ázimova Konstıtýsıalyq komısıa talqylaý qorytyndysy boıynsha jańa Konstıtýsıa jobasyn jalpyhalyqtyq referendýmǵa shyǵarýdy usynatynyn jetkizdi.
Memleket basshysy Konstıtýsıalyq komısıanyń óte aýqymdy ári mańyzdy jumys atqarǵanyn atap ótti. Prezıdenttiń pikirinshe, jańa Konstıtýsıa erejeleri memleketimizdiń ınstıtýsıonaldyq negizin transformasıalaý úderisi tolyǵymen aıaqtalyp, múlde jańa konstıtýsıalyq úlgige kóshetinin kórsetedi.
Qasym-Jomart Toqaev jańa Ata Zań jobasy qoǵamdaǵy ózekti qundylyqtar men memlekettik saıasat qaǵıdattaryn aıqyndap qana qoımaı, Qazaqstannyń odan ári progresıvti damýyna negiz qalaıtynyn aıtty.
Prezıdent mańyzdy jumysty kásibı turǵyda atqarǵan Konstıtýsıalyq komısıa múshelerine rızashylyǵyn bildirdi. Sondaı-aq Komısıa músheleriniń jańa Konstıtýsıa jobasyn tikeleı efırde talqylaýy qoǵamdyq dıalogtiń joǵary deńgeıin tanytqanyna nazar aýdardy.
Budan bólek, Memleket basshysy jobany ázirleý men talqylaýǵa myńdaǵan azamattyń belsene atsalysqanyna toqtalyp, bul «Halyq únine qulaq asatyn memleket» tujyrymdamasyna saı keletinin jáne jańa Konstıtýsıanyń shynaıy halyqtyq sıpatyn kórsetetinin atap ótti.
Qasym-Jomart Toqaev taıaý arada jańa Konstıtýsıany qabyldaý boıynsha respýblıkalyq referendým ótkizý týraly Jarlyqqa qol qoıatynyn málimdedi.
