كوكسۋ قانت زاۋىتىنىڭ ديرەكتورى التىنبەك اباتوۆتىڭ ايتۋىنشا، ءبىرىنشى كۇنى زاۋىتقا 100 تونناعا جۋىق ءونىم اكەلىنگەن. العاشقى بولىپ ءونىم جەتكىزگەن شارۋا قوجالىقتارى كەشكە دەيىن تاعى 2-3 رەيس جاساعان. قىزىلشاداعى قانت مولشەرى 12-13 پايىزدى قۇرايدى، كۇن سۋي باستاعاندا بۇل كورسەتكىش ارتا تۇسەدى. ءونىمدى وڭدەۋ 15 قىركۇيەكتەن باستالىپ، 220-250 توننا قانت قىزىلشاسى وڭدەلمەك.
قانت زاۋىتىنا ءونىم اكەلگەندەردىڭ ءبىرى – راحادىر دوعدىربەك. كوكسۋ ستانسياسىندا قىزىلشا جيناۋدى باستاعان «مەكە» شارۋا قوجالىعىنىڭ باسشىسى ءقازىر ءونىم جيناۋعا 30 ادام جۇمىلدىرىلعانىن ايتتى. اۋا رايى قولايلى بولسا، ەگىن قىركۇيەك ايىنىڭ سوڭىنا دەيىن جينالىپ بىتەدى.
راحادىر دوعدىربەك اۋىل شارۋاشىلىعىمەن 2012 جىلدان بەرى اينالىسىپ كەلەدى. ول 50 گەكتار ەگىستىك جەرىنىڭ 15 گەكتارىنا بيىل قانت قىزىلشاسىن سەپكەن. شارۋا قوجالىعىنىڭ ءتاتتى ءتۇبىر وسىرۋگە دەن قويعانىنا 8 جىل بولىپتى.
– باستاپقىدا 5 گەكتارعا سەۋىپ باستاعانمىن. ءقازىر 15 گاكتارعا جەتكىزدىم. بۇل داقىلدى كۇتىپ-باپتاي بىلسەڭ، سوعان ساي ءونىمى دە جوعارى بولادى، – دەيدى شارۋا.
قاراتال اۋدانىندا قانت قىزىلشاسىن جيناۋعا العاشقىلاردىڭ ءبىرى بولىپ «بەكمۇرزايەۆ» شارۋا قوجالىعى كىرىستى. بۇل قوجالىق 2015 جىلدان باستاپ قانابەك اۋىلىندا جۇمىس ىستەپ تۇر. باسشىسى بەرىك شەگەبايەۆتىڭ ايتۋىنشا، 10 گەكتار سۋارمالى جەردىڭ 6 گەكتارىنا قانت قىزىلشاسى ەگىلگەن. بيىل سۋارمالى سۋ جەتكىلىكتى بولعاندىقتان ءونىم دە مول شىققان، ءار گەكتارىنان 700 سەنتنەردەن اينالۋدا.
القاپتا قىزىلشا جيناۋدا 20 ادام ەڭبەك ەتەدى. ءقازىر قوجالىق جەتەكشىسى قىزىلشا جينايتىن كومباين ساتىپ الۋدى جوسپارلاپ وتىر. ول ءۇش ۇلى دا وزىمەن بىرگە القاپتا جۇمىس ىستەيتىنىن، كولىكتىڭ كەز كەلگەن ءتۇرىن جۇرگىزە الاتىندارىن ايتادى. ياعني، ولاردىڭ تەحنيكانىڭ ءتىلىن ءتۇسىنىپ، جۇمىستى ءساتتى جالعاستىرا الاتىندارىنا سەنىمدى.
ەسكە سالساق، وسى جىلى كوكسۋ اۋدانىندا 114 شارۋا قوجالىعى 1881 گەكتارعا، ال قاراتال اۋدانىندا 75 شارۋا قوجالىعى 1106،7 گەكتارعا قانت قىزىلشاسىن ەككەن. ال جالپى وبلىس بويىنشا بيىل 8100 گەكتار القاپقا قىزىلشا سەبۋ جوسپارلانسا، بۇل كورسەتكىش 8742 گەكتاردى قۇرادى. وڭىردە 370 مىڭ توننا ءتاتتى ءتۇبىر جينالىپ، 62 مىڭ توننا قانت وندىرىلەدى دەپ كۇتىلۋدە.
